– For min del gjekk det ikkje så bra, eg slit litt teknisk i konkurransehoppa mine og då blir det ikkje så artig, seier Fannemel.
Laurdag enda 24-åringen som nummer 41 etter eit hopp på 87 meter. Med 108, 4 poeng var han eit hav bak vinnaren Severin Freund.
Gjorde justeringar
Men om hoppinga laurdag var nedslåande for Fannemel, skulle sundagen vise seg å bli verre. Trass i endringar i teknikken, mislukkast han i kvalifiseringshoppet, og var siste hoppar som ikkje kom med i ettermiddagens renn i Lysgårdsbakken.
– Eg prøvde å endre sittestillinga i tilløpet til i dag, og det fekk eg eigentleg til og. Men når eg kom til hoppet så køyrde eg same bevegelsesmønster som laurdag, men frå ein annan posisjon, og då fungerte det ikkje.
– Famlar du litt no med å finne rette teknikken?
– Det kan du godt seie når eg ikkje klarar å bli betre enn i dag, men det har fungert bra på trening. Men så missa eg litt i 90 metersbakken i går og i dei to-tre hoppa eg har fått denne helga.
Håpar å lukkast i Russland
På onsdag reiser Fannemel til Russland, og håpar å lukkast betre der enn han gjorde denne helga på heimebane.
– Då får eg nye sjansar til å ta meg saman, eg må berre jobbe vidare.