Det er dei to trålarane «Stjørnan» og «Polarhav» frå reiarlaget JFK som har hatt tilhald i den overbygde tørrdokka på verftet. Tørrdokka har stått ledig i påvente av neste nybygg frå skrogverftet.
– Dette arbeidet har gitt oss kjærkome arbeid i ei tid med litt slakk og der vi har hatt ledig kapasitet, seier Jan Helge Solheim, som har hatt ansvar for arbeidet.
– Jobben har stort sett gått etter planen, og vi har ei fornuftig inntening. Dette viser at vi kan vere med på å konkurrere om reparasjon og ombyggingsjobbar.
Treng fleire slike oppdrag
Det var i byrjinga av november dei to trålarane kom til Leirvik, sterkt prega av mange tokt i vêrharde havstrok. No er dei blitt som nye etter sandblåsing og måling. I tillegg er det montert nye slingrekjølar og hovudmotorar og hjelpemotorar er overhalte.
Også propellane har fått overhaling, og det er lagt inn fast ballast og lagt ny dørk i innreiinga, skriv Havyard i ei pressemelding.
Og no prøver Havyard å få fleire slike oppdrag, for det er svært magert på nybyggingssida. I slutten av oktober vart det kjent at 60 årsverk forsvinn ved verftet i Leirvik. For ei veke sidan vart det informert om at nesten alle dei tilsette blir permitterte fordi bygginga av ein islandsk trålar er utsett i eitt år.
- Les også:
- Les også:
- Sjå tv-innslag: