Nokre få tusenlappar per kommune kan hjelpe fleire offer for seksuelle overgrep

– Incestsenteret gjer ein veldig viktig jobb, og det er gode resultat av arbeidet dei gjer, seier Jenny Følling, leiar i Sogn og Fjordane KS.

Difor har dei no sendt eit brev til dei 25 kommunane i fylket som støttar Smiso med fire kroner per innbyggar. Dei ber kommunane gi ei krone ekstra per innbyggar.

– KS har behandla dette som sak, og anbefalt kommunane om å auke si støtte, seier Følling.

• LES OGSÅ: Vil lære barn og unge om overgrep

Treng pengane for å halde kvaliteten

Summen av ei krone per innbyggar blir berre 110.000, men det vil samstundes utløyse eit statleg tilskot på 435.000 kroner. Til saman vert det nok til ein ekstra tilsett.

– Dersom vi skal kunne gi det same tilbodet og den same kvaliteten som i dag, treng vi å auke bemanninga på senteret, seier Chatrine Elholm, dagleg leiar på Smiso.

• LES OGSÅ: Opnar incestsenter i Sogn og Fjordane

Senteret gir eit gratis tilbod om hjelp til menneske som har traume etter incest og valdtekt. Sidan dei opna i 2012, har dei i gjennomsnitt fått ein ny brukar kvar dag. No ser Elholm at dei treng meir pengar for å kunne ta i mot fleire brukarar.

– Vi har hatt veldig stor pågang både frå brukarar, hjelpeapparat og fagmiljø i fylket, seier Elholm.

– Ikkje mange tusenlappar

Oddmund Klakegg, ordførar i Jølster, kan ikkje sei om dei vil gi meir, men ser at det er svært lite senteret ber om.

– Det er ikkje ein stor sum, og ser ein isolert på Jølster er ikkje dette mange tusenlappar. Dette kan løyse ut mykje statlege midlar, seier Klakegg.

Dagleg leiar Elholm på Smiso, håpar Klakegg og dei andre ordførarane vil finne pengar i kommunekassen.

– Vi tenkjer at vi er eit veldig rimeleg og viktig tilskot til helsetilbodet i fylket, og at det er ei billeg investering for kommunane, seier Elholm.