Har gitt frå seg kontrollen for å få utvikling

– Det har vore utruleg spanande og gøy. Førre plate laga vi eit studio heime i leilegheita i Oslo. Vi tenkte at no har vi gjort det, no må vi ut å gjere noko nytt, seier Eva Weel Skram.

Ekteparet Eva Weel Skram og Thomas Stenersen har tidlegare gitt ut fire album. Med songen «Told you» har duoen teke eit steg vidare i karrieren.

• SJÅ OGSÅ: Musikkvideoen til Told You, der Eva forvandlar seg til vampyr.

Lenger nede kan du høyre radiopraten med Weel Skram. Der kan du høyre to nye singlar, og artige historier frå innspelinga av musikkvideoen.

– Merkeleg å gi frå seg kontrollen

Denne gongen tok dei steget ut av komfortsona og arbeider dei med to produsentar, ein i Stockholm og ein i København.

– Kvar gong vi har laga ei plate har vi gjort det annleis enn tidlegare. Vi er opptekne av utvikling. Men når du har hatt full kontroll på alt som har skjedd på dei fire siste platene, er det litt merkeleg å gje frå seg kontrollen, sjølv om vi bestemmer til slutt

Likevel er dei strålande nøgde, både med arbeidsprosessen og med resultatet. Dei har jobba med «Told You» i to år.

– Vi har fått høyre refrenget er veldig typisk oss. Men uttrykket er ganske annleis. Vi har aldri jobba med produsent før, det er alltid Thomas som har gjort det. Det kan slå begge vegar, men her har det vore full klaff, og veldig spanande og gøy, seier Weel Skram.

To singlar om gongen

Songen er allereie lista på P3, og det er den åttande gongen Eva & The Heartmaker vert lista. Til våren vert det Norges-turné og neste haust kjem eit nytt album.

– Det er absolutt Eva & The Heartmaker folk kjem til å få høyre. Vener og kjente seier dei kjenner oss igjen. Men det er ein fornya versjon. Vi kan ikkje lage dei same albuma gong på gong.

I denne omgang kjem to singlar. I tillegg til nemnde «Told You», kjem singelen «Take a ride».

• LES OGSÅ: Popartist Eva Weel Skram syng duett med onkelen i NRK Julelutt

– Det er ein av mine favorittar frå plata som kjem neste haust. Det er eit albumspor som kanskje hadde drukna om alt kom ut samstundes, seier Weel Skram.

For valet om å sleppe to singlar om gongen er ei tilpassing til bransjen, seier ho.

– Det er litt annleis enn før i musikkbransjen. No kan alle høyre alt på nettet. Det er fantastisk, og ein bra måte å nå ut til folk. Men når du gir ut album er det 10–12 låtar, og det kan bli mykje for folk å fordøye. Med to og to er det kanskje større interesse for å høyre på begge undervegs. Så kjem albumet.