– Utgangspunktet var at vi såg at nokon laga noko tilsvarande på Dvergsdalsstøylen tidleg på 1990-talet og vi syns det var så fantastisk. Sidan har vi tulla med tanken om å gjera det sjølve, seier Rønnaug Johanne Dvergsdal.
Og under ein hyttetur til Dvergsdalen i Jølster i helga, saman med dei tre søstrene sine, ei venninne og barna, laga dei ei enorm gul påskehøne framfor hytta.
– Grunna rasfaren og litt dårleg vêr så kunne vi ikkje gå på ski. Så då sette vi berre i gong med å laga dei, ler Dvergsdal.
Med totalt 13 små og store sette dei i gong med å bygge påskehøna. Om lag to timar etter var dei ferdig. Dagen etter fekk dei tak i noko utgått gulmåling og farga den gul.
Det var Firda Tidend som først skreiv om saka.