Dette epletreet blomstrar i september

Han og kona bur halve året på Lærdalsøyri, i eit eldre hus med eigen frukthage.

– Noko slikt har eg aldri sett før. Både eple og blomster på same grein tykkjer eg er spesielt, seier Arne Sommer.

Færre eple enn vanleg

Det var tanta hans som først oppdaga den spesielle greina på det gamle Prinse-treet. Ved sida av modne og flotte eple, er det full bløming på ei grein.

Vanlegvis står trea i full blomst om våren. Arne Sommer veit ikkje kvifor noko av treet blomstrar no i haust, men trur den kalde våren har skuld i det. Men eple blir det neppe av blomane.

– Nei, kulda tek nok knekken på dei før det kjem så langt, seier han.

• LES OGSÅ: Slik får du hagen til å overleve

Kald start på sommaren har også ført til mykje færre eple enn normalt i den gamle frukthagen.

– Eg har litt ulike epletre utanfor huset og det er ikkje så mykje eple som vanleg her i hagen min, seier han.

• LES OGSÅ: Slik beskjærer du epletreet og hekken

Slikt skjer av og til

Fylkesgartnar Torbjørn Takle seier det ikkje er heilt uvanleg at epletre blomstra på feil tidspunkt.

– Det er nok den kalde og seine våren som har ført til dette. Blomstringa kom seint i gang og difor har denne brått byrja blomstre på seinsommaren. Men eple blir det ikkje, det har ikkje blomane nubbesjanse til å bli no så seint på fruktsesongen, seier Takle.