Før det hadde gått halvtimen av oppgjeret mot Åsane, hadde Jim Johansen funne vinkelen to gonger.
- Les også:
Begge frå hjørnet av 16-meteren. Og begge utagbare for keeperen.
– Dei var fine, men eg har scora finare mål, gliser han.
Kan avgjere kampar
Harstadværingen er i vår lånesoldat i sin sjette klubb og viste mot Åsane kva avslutningskvalitetar som bur i han og venstreslegga.
– Det var moro for Jim. Han har jobba hardt sidan han kom, og eg veit det bur mål i han. Han må berre stå på og jobbe hardt framover. Det gjorde han i dag, og då veit vi at han kan avgjere fotballkampar, seier Sogndal-trenar Eirik Bakke.
Banas beste
Sigeren, og ikkje minst spelet, var etterlengta for Sogndal. Førre heimekamp enda i tap for Levanger. Så tapte dei to poeng på overtid mot Kristiansund.
Mot Åsane var Sogndal klart best i 90 minuttar. Etter 70 minuttar vart ein tydeleg sliten Johansen bytt ut. Like før slutt vart han kåra til heimelagets beste spelar.
– Det var i alle fall godt å score i dag, seier 28-åringen.
– Glitrande fotball
– Eg tykkjer vi spelar glitrande fotball i dag. I alle fall i 1. omgang. Vi hadde hurtige kombinasjonar og god flyt i spelet. Då klarer ikkje Åsane å henge med, seier Johansen.
Trenar Bakke kunne trekkje godt på smilebandet etter tre nye poeng. Ikkje minst var han nøgd med responsen etter Levanger-tapet. Sigeren mot Åsane kunne, og burde, vore større.
Robin Shroot sitt soloraid mellom Johansen sine scoringar sytte for 3-0-siger.
– Vi kunne fort scora fleire mål heile gjengen, og det lovar godt at vi kjem til mange sjansar, seier han.
– Sogndal var gode
– Etter den dårlege heimekampen sist, så venta eg ei heilt anna innstilling i dag. Det fekk vi. Når vi spelar slik som i dag, så trur eg fleire kan slite mot oss, legg Bakke til.
Det er Åsanes Haakon Lorentzen samd i. Overraskingslaget, som stod ubesigra på seks kampar før turen til Fosshaugane, kom kraftig ned att på jorda.
– Sogndal gjorde ein god kamp. Vi kom med sjølvtillit og skulle spele vårt spel, men i dag var vi ikkje gode nok. Vi kom på etterskot i alt vi dreiv med og sleit frå starten av, seier han.
Bergensblad herja
Dei to «bergensblada» Petter Strand og Lars Christian Kjemhus var blant dei som gjorde arbeidsdagen vanskeleg for Åsane. Sistnemnde har sjølv budd i Åsane. Den tidlegare Fana-spelaren var strålande nøgd med sin arbeidsdag.
– Eg storkosa meg. Ting sat for heile laget, og då er det gøy å spele fotball, stråla 21-åringen.
– Det er spesielt kjekt med denne sigeren, mot gamle lagkameratar og kjende frå Åsane, der eg sjølv budde ein liten periode, legg han til.
– No er de på tabelltopp. Skal de halde dykk der?
– Eg håpar det. Det er opp til oss sjølve. Når vi spelar slik, er vi beste laget i ligaen.