NRK Meny
Normal

Endeleg kunne Mira feire bursdag på rett dag

Sist ho verkeleg kunne feire bursdag på rett dag, stod det 2012 på kalenderen. Måndag kunne Mira Valvik Snæland for andre gong invitere til feiring på skotårsdagen.

Mira Valvik Snæland

SKOTÅRSBARN: Mira Valvik Snæland feirar bursdag kvart år, men synest det er kjekkast å kunne feire på den eigentlege dagen.

Foto: Privat

– Det er gøy og litt spennande når ein endeleg har bursdag. Det går jo fire år før du har bursdag, fortel åtteåringen som måndag gjesta NRK Sogn og Fjordane si ettermiddagssending i radio.

Ei av ganske få

Mira Valvik Snæland som fireåring

FØRRE GONG: Mira Valvik Snæland på fireårsdagen.

Foto: Privat

Fødd 29. februar 2008 har det blitt smått med smått med verkelege bursdagar for den unge Førde-jenta. Åremålsdagen må stort sett feirast ein dag for tidleg eller ein dag for seint. Førre bursdag var ho fire. Den hugsar ho lite frå.

– Eg hugsar berre at eg song «gratulerer med dagen» til meg sjølv, og så miksa eg den med «Rosa Helikopter», ler andreklassingen.

Ifølgje Statistisk sentralbyrå kan 3 493 skotårsborn feire bursdagen sin måndag 29. februar i år. Til samanlikning feirar 14.766 bursdagen sin dagen i før, mens 15.708 nordmenn er fødde 1. mars. Av alle skotårsborna, er det i år flest 28-åringar.

Feirar dagen lang

Skotårsbarnet er strålande nøgd med dagen som starta med frukost og kake på senga.

– Den har vore veldig fin. Eg klarte meg bra på skulen, og alle sa gratulerer med dagen til meg. Og veit du, det er noko kult med skulen, altså. Det er ein i 2B har bursdag på akkurat same dag!

Med presangar i form av både klede, pengar og leiker har dagen svara til forventningane. Og planen for feiringa:

– Vi skal leike. Det er på Leikand i Førde. Vi skal ha det gøy, leike og ete kake. Og vi skal ha mange av vennane mine, alle jentene i klassen, fortel skotårsbarnet Mira Valvik Snæland.

Neste gong Mira og andre skotårsbarn har bursdag på rett dato, skriv vi 2020.

Mira Valvik Snæland sin skotårsbursdag

JENTEFEST: Slik såg det ut då Mira Valvik Snæland feira skotårsbursdag måndag ettermiddag.

Foto: Privat
Den nye regjeringa vurderer å kvitte seg med odelslova. Det kjem ikkje på tale, svarer bøndene.
Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.