Neste søndag får nemleg øybuarane ferje. Kabelferja «Hisarøy» vart døypt i dag, og neste helg blir den sett inn på sambandet Hisarøy-Mjåneset.
Ferja blir den aller første som har gått ut til øya, og det kjem til å merkast, fortel Stendal.
– Vi har snakka om denne ferja i 30 år, så den har hatt ein trong fødsel, seier ho til NRK.no.
- LES OGSÅ:
- LES OGSÅ:
Som natt og dag
51-åringen jobbar på eit rekneskapskontor i Eivindvik, men vegen til jobb har til no ikkje vore den enklaste.
– Eg har vore så heldig at eg har fått byrje på jobb slik at eg kan reise med skuleruta. Det har vore fint. Men når ikkje skuleruta har gått, har eg måtte reise med eigen båt, seier ho.
Og båtturen frå garden deira på nordsida av øya i all slags vêr ser ho fram til å sleppe.
– Når det har vore mykje nordavind har det ikkje vore spesielt kjekt, vedgår ho.
Kan ta ein bil heile vegen
Dei aller fleste av dei 30 fastbuande på øya har gjort det på same måte, brukt eigen båt over til fastlandet. Med ein bil på fastlandet og ein på øya har kabalen gått opp.
Men no blir det snart mykje lettare. Når ferja blir sett inn frå neste søndag av blir kvardagen ein heilt anna.
– No kan vi reise på arbeid, vi kan handle, og vi kan setje oss i bilen og stogge rett utanfor døra og bere med oss varene inn, seier ho og legg ikkje skjul på at ho gler seg.
(Artikkelen held fram under Tv-saka)
Den første av sitt slag
Ifølgje Firda.no blir «MF Hisarøy» den første batteridrivne ferja i Norge. Ferja er bygd på Solund Verft AS i samarbeid med Wergeland AS og Maritime Engineering AS Knarvik.
– Det er eit batteri om bord som driv ferja, rett og slett. Ferja skal spolast fram og tilbake etter to kablar, seier senioringeniør ved Solund Verft, Jan Petter Færøy til Firda.no.
Fredag var det ferjedåp, og Stendal og resten av øybuarane stilte mannsterke.
– Eg trur dei aller fleste var der, seier ho til NRK.no.