Elferja får ikkje lade - berre to ferjer i drift

– Det er noko med ladinga. Inntil vidare går vi med ferjeavgangar på 25 minutts intervall, opplyser driftsvakt Arve Finnvik i Norled.

• Les også: Bilistane på E39 fortvilar over kontaktrøbbelet til Norled
• Sjå oppdaterte vegmeldingar på NRK Trafikk

Kostar reiarlaget pengar

Prestisjeprosjektet «Ampere» har så langt hatt ein vanskeleg start på Sognefjorden. Den batteridrivne ferja som er bygt i Hardanger er den første i sitt slag. Den skulle gått i rute som ei av tre ferjer alt frå 1. januar då reiarlaget Norled tok over E39-sambandet etter Fjord1.

Ferja vart fleire veker forseinka før den vart sett i trafikk. Etter kort tid oppstod problem med ladestasjonen på Lavik-sida. Problem ein så langt ikkje har funne varig løysing på.

Reiarlaget hadde frist på seg til 1. april på å få bukt med ladeproblema til Ampere. Norled blir økonomisk straffa av Statens vegvesen når det ikkje går tre ferjer på sambandet, slik anbodet krev.

• Les også: Kan tape store summar på ladetrøbbel
• Les også: Nektar å vente tre månader på ferje

Kan bli ein og anna tur

Mens det til no har vore ladestasjonen på Lavik-sida som har vore trøblete, har det i løpet av helga også vore vanskar på Oppedal-sida, ifølgje driftsvakta i Norled.

– Det var problem på Oppedal-sida i går. Ferja får ikkje nok straum.

Inntil vidare blir det derfor ferjene «Stavanger» og «Stavangerfjord» som tek seg av trafikken over Sognefjorden.

– Men det kan vere at Ampere går enkelte turar, seier Finnvik.