Eksporterte langt mindre, tente meir pengar

Hopp til innhold

Trass kraftig reduksjon i eksporten, tente sjømatnæringa meir pengar i februar i år enn på same tid i fjor.

– Styresmaktene har avgrensa veksten til at vi har fått kontroll med lusesituasjonen i Norge, men vi har klart å halde prisnivået på lakseprodukta på eit historisk høgt nivå, seier Espen Søraa i Coast Seafood.

Er sårbare

I volum gjekk eksporten ned med 19 prosent til 196.000 tonn. Verdien auka med seks prosent til 448 millionar kroner.

Utviklinga set næringa i ein sårbar situasjon ved eit prisfall.

– Det er også uroa for oss. Vi ynskjer vekst i volum generelt sett, men samstundes har vi eit historisk høgt prisnivå. Det gir også ein negativ effekt. Etterspurnaden vil falle ved høge prisnivå, så vi må passe på at vi ikkje prisar oss ut av marknaden på langsint, seier Søraa.

Positivt for laks

Coast Seafood i Måløy er eitt av dei store norske selskapa for eksport av oppdrettslaks og aure. I tillegg eksporterer dei sild, makrell og kvitfisk.

Utviklinga er ikkje lik for alle sortar, men laksen har hadde i februar ei svært god utvikling.

Slik eksportere Norge i februar

Slik var eksporten i februar 2017 samanlikna med februar i fjor.

Laks:

Norge eksporterte 72.800 tonn laks til ein verdi av 4,9 milliardar kroner. Verdien auka med 692 millionar kroner (16 prosent).

Aure:

Norge eksporterte 2.500 tonn aure til ein verdi av 187 millionar kroner. Volumet fall med 3.700 tonn, medan prisen fall med 104 millionar (36 prosent).

Fersk- og fryst torsk:

Inkludert skrei eksporterte Norge 12.600 tonn fersk torsk. Dette representerer ein verdi av 428 millionar kroner. Sjølv om snittprisen auka seks prosent, fall verdien med 13 millionar kroner på grunn av ein nedgang i volum på 1.200 tonn.
Det vart også eksportert 6.300 tonn fryst torsk til ein verdi av 221 millionar kroner. Det er ein nedgang på 1.000 tonn og åtte millionar kroner.

Klippfisk:

Det vart eksponert 6.800 tonn klippfisk til ein verdi av 274 millionar kroner i februar. Det er ein auke på 2.000 tonn og 67 millionar kroner.

Saltfisk:

I februar vart det eksportert 2.000 tonn saltfisk til ein verdi av 85 millionar kroner. Volumet fall med 800 tonn, medan verdien fall med 27 millionar kroner (24 prosent).

Sild og makrell:

Det vart eksportert 30.500 tonn sild til ein verdi av 340 millionar kroner. Det er ein auke på 2.000 tonn i volum, men verdien fall med ti millionar kroner (3 prosent).
Det vart eksportert 26.000 tonn makrell til ein verdi av 295 millionar kroner. Volumet fall med 5.400 tonn, medan verdien fall med 40 millionar kroner (12 prosent).

Kongekrabbe og reke:

Det vart eksportert 159 tonn kongekrabbe til ein verdi av 40 millionar kroner. Det er ein nedgang i volum på 104 tonn, medan verdien fall med 20 millionar kroner (34 prosent).
Det vart eksportert 24 tonn mindre reker, medan verdien fall med ni millionar kroner. Totalt vart det eksportert 544 tonn til ein verdi av 42 millionar kroner.

Kjelde: Norsk sjømatråd

– Lakseeksporten i februar var på same nivå som i februar i fjor. Eksporten til EU gjekk tilbake med 3.900 tonn, medan den totale nedgangen var på 800 tonn. Det er særskilt til USA at lakseeksporten aukar utanfor EU, seier kommunikasjonsdirektør i Noregs sjømatråd, Geir Håvard Hanssen.

Spent Søraa

Det passar godt med erfaringane til Søraa og Coast Seafood.

– Dei tradisjonelle marknadane i Europa får først problem med det høge prisnivået. Vi må fokusere meir på fjerntliggande marknader, og dei ser ut til å vere i stand til å akseptere ein høgare pris enn Europa, seier Søraa.

– Men vi har generelt sett lite erfaring med korleis høgt prisnivå slår ut på næringa, så det blir spennande å følgje med, legg han til.