Eitt års fengsel vart til eitt års samfunnsstraff

Mannen i 40-åra var ein av tre som før jul vart dømde for hasjplantasjen politiet avdekka for tre år sidan .

Nordfjordingen erkjende straffskuld for å ha dyrka fram 2,5 kilo marihuana på to år. Han erkjende også straffskuld for å ha dyrka fram 17 plantar som ville gjeve ytterlegare halvkiloen.

Mannen vart i Sogn og Fjordane tingrett dømd til fengsel i eitt år, men anka straffutmålinga til Gulating lagmannsrett.

I staden for fengsel, må mannen gjere 360 timar samfunnsstraff i løpet av eitt år. Alternativt må han sitje eitt år i fengsel. Det er førebels uvisst om påtalemakta vil anke avgjerda.

– Samfunnet har lite å tape på å gi ham ein slik sjanse: Går det gale, ja så veit han veldig godt at det ventar soning av ei subsidiær fengselsstraff, seier forsvarar Ivar Blikra.

Påtalemakta stod i lagmannsretten fast på kravet om eitt års fengsel då lagmannsretten handsama anken på straffutmålinga. Advokat Blikra meiner på si side meiner at ei lengre fengselsstraff vil vere uheldig med tanke på rehabiliteringa av mannen sine rusproblem.

Lagmannsretten ser ikkje vekk ifrå at nordfjordingen si sjukdomsutvikling og «inngangen til ein langvarig misbruk grunna i sjølvmedisinering, skuldast forsøming frå samfunnet si side i høve den omfattande omsorgssvikten han vart utsett for i ung alder»

Nordfjordingen har fått plass for behandling av rusmisbruket. Dette er nytt sidan tingretten handsama saka.

– Ei samfunnsstraff er eigna til å byggje opp rundt rehabiliteringa. Ved soning av lang fengselsstraff ville ein risikert at rehabiliteringa ville blitt sett tilbake. Ovanfor særskilt sårbare personar vil truleg ei lengre fengselsstraff vere direkte skadeleg for rehabiliteringa, seier Blikra.

Lagmannsretten legg vekt på at mannen har teke tak i eigen livssituasjon. Med unnatak av ein sprekk ved årsskiftet, har nordfjordingen vore rusfri i over eitt år. Retten meiner mannen har teke viktige steg mot, og verkar motivert for, eit rusfritt liv.

Difor meiner lagmannsretten at samfunnsstraff er rett reaksjon, sjølv om mannen har vore kort tid i rehabilitering.

– Det ligg no føre ei klar positiv utvikling, skriv lagmannsretten i rettsavgjerda.

Advokat Blikra er glad for lagmannsretten si vurdering og at nordfjordingen får sjansen som ligg i ei samfunnsstraff.

– Det er lite som gler ein forsvarar meir enn når domstolen viser sitt humane ansikt ovanfor ein sikta med eit så vanskeleg utgangspunkt, seier han.