Trass triumfen var det ein avdempa førdianar som tok telefonen like etter landing på Gardermoen laurdag.
– Vi må vere edruelege og innrømme at det er ein viss forskjell på nivået i Nord-Europa og Norge kontra Grand Slam i verdsserien. Men det er godt å prestere der vi skal vere best, seier Eithun.
– Avsluttar kampen litt for tidleg
Turneringa i Finland er for lag frå den nordeuropeiske volleyballsona. I år stilte det lag frå Danmark, Finland, Sverige, Norge og England.
Finalen for herrar vart spelt mellom Horrem/Eithun frå Norge og Sheaf/Gregory frå England. Den norske duoen tok sigeren i to strake sett.
– Vi spelar ein veldig bra kamp. Første settet er ganske jamt. Andre settet har vi full kontroll, før vi rotar det litt til på slutten. Alt i alt har vi bra kontroll, men vi avsluttar kampen litt for tidleg, fortel Eithun.
- LES OGSÅ:
Viktige poeng før OL-kvalik
Dermed held den norske duoen fram med å plukke viktige poeng før OL-kvalifiseringa som startar neste år. For det er OL i Rio i 2016 som er det verkelege målet.
– Poenga kan avgjere om vi kjem med i hovudrundane eller kvalifiseringsrundane til Grand Slam og verdsserieturneringane som startar til neste år. Motstandarane er alltid tøffe, men det er viktig å sleppe kvalik, seier Eithun.
Om dryge to veker ventar ei World Tour-turnering i Kina. Der vil dei få bryne seg på langt betre motstand enn dei har møtt i Finland.
– No har vi hatt tre gode turneringar fram mot den World Touren, så det lovar bra, seier Eithun.