Medan tusenvis av flyktningar strøymer inn i norske asylmottak etter at dei har rømt frå krig, vald og elende i land som Syria og Afghanistan, sit 5100 flyktningar med opphaldsløyve i dei same asylmottaka og ventar i uvisse.
– Det å la folk bli sitjande i uvisse og vente på denne måten gjer at dei ikkje får kome i gang med liva sine. Det er eit svik mot dei som har ofra alt og rømt frå krig og naud, seier Johnsen.
Ved asylmottaket i Førde sit 23 år gamle Tedros Desta og 22 år gamle Michaele Memari, begge frå Eritrea. Først venta dei eitt år på å kome inn til asylintervju. No er det fire månader sidan dei fekk opphaldsløyve, men kva tid dei får flytte ut i ein kommune er høgst uvisst. Det synst dei er leit.
- Les også:
– Eg har lyst å kome ut i jobb og det er veldig tungt å bli sitjande å vente i uvisse, fortel Tedros. Han jobba som elektrikar i Eritrea og håper å kunne jobbe innan same bransje i Norge.
Johnsen og SV vil ha slutt på at kommunane kan seie nei til å ta imot flyktningar.
– Det går ikkje an lenger at kommunane sjølve skal få avgjere dette, seier ho.
Frp til åtak på SV
Fylkesleiar i Framstegspartiet, Lars Svein Drabløs, meiner ein ikkje må endre dagens ordning der kommunane kan seie nei til å ta imot flyktningar. Han går i strupen på SV.
– Då dei raudgrøne partia gjekk ut av regjeringskontora, sat det nærmare 6000 flyktningar med opphaldsløyve på ulike asylmottak og venta på å kome ut i ein kommune. Dei raudgrøne hadde ein så dårleg integreringspolitikk at flyktningane stort sett vart integrerte inn i NAV, seier Drabløs.
– No skyt du på SV, men situasjonen er ikkje mykje betre i dag. 5100 med opphaldsløyve sit no og ventar på å få flytte ut i ein kommune. Kva kommentar har du til det?
– Nei, situasjonen er ikkje noko betre. No får vi sjå kva regjeringa vil gjere.
– Men har ikkje Johnsen rett i at det er eit svik mot dei som blir sitjande årevis i uvisse på eit asylmottak?
– Jau, og slik har det vore dei siste ti åra.
–Men kvifor ikkje gjere noko med det?
– Å tvinge kommunar til å ta imot flyktningar vil i alle fall ikkje gje god integrering. Dette må kommunane sjølve få avgjere.
- Les også:
Paradoks
Johnsen poengterer at det ofte er dei same kommunane som fortvilar over nedgang i folketalet som seier nei til flyktningar.
– Dette er eit stort paradoks, seier ho.