Mykje har siste par åra endra seg for 23-åringen frå Balestrand.
I 2012 og 2013 var Eirik Bergum Skaasheim fast på eliteserielaget Sogndal og med på U21-landslaget. Så kom skadar, benketilvære og ein brøkdel med speletid.
– Ingen har lyst til å reise landet rundt for å sjå kameratane spele fotball. Du vil medverke. Det er difor vi er her og difor vi trenar kvar dag, seier Eirik Bergum Skaasheim.
Realistisk
Det er ikkje kven som helst 23-åringen konkurrerer mot om plassen på høgreback. Taijo Teniste er ein av klubbens lågaste, men samstundes viktigaste, spelarar. Også offensivt. I tillegg er 28-åringen estisk landslagsback.
Som alle fotballspelarar ynskjer Skaasheim speletid frå start. Men han har ei jordnær og realistisk haldning til situasjonen.
– Taijo er eigentleg ein komplett spelar. God framover og bakover, rask og god med ball. Eg veit ikkje om eg kan tilby så mykje meir enn Taijo, men eg føler at eg matchar han på ein del ting. Så har eg litt å hente på det defensive, seier Skaasheim.
– Og på dei ferdigheitene er det ikkje lett å ta store steg på ein vinter. Det er ting som må jobbast med over tid, og ein kode som må knekkast, seier Skaasheim.
Budd på å kjempe
23-åringen signerte i fjor ny kontrakt med klubben. Då på eit tidspunkt der ting tydde på at Teniste ville reise frå bygda. Så signerte estaren ny kontrakt.
Konkurranse om plassane skjerpar spelarane, og Skaasheim er også i år budd på å brette opp ermane for å få speletid.
– Taijo er kanskje den aller beste spelaren vi har, og den som er aller verst å konkurrere mot. Men det er berre å stå på og gjere det du kan. Du veit aldri. Han kan bli skadd i første serierunde, utan at eg håpar på det. Du må berre vere klar og ta sjansen når du får den, seier han.
Rosar kampviljen
Trenar Eirik Bakke rosar Skaasheim for måten han taklar kampen om speletid. Trass i lite speletid siste åra, meiner Bakke at Skaasheim har utvikla seg stor.
– Mest gledeleg at han har løfta mykje av spelet og fysikken mange hakk. Spesielt i vinter har han gjort ein fantastisk jobb. Han står mykje sterkare no enn tidlegare, seier Bakke.
– Taijo er ein av våre beste spelarar, så det er ein utsett posisjon. Men vi veit at vi kjem til å få bruk for Eirik i mange kampar framover, held Bakke fram.