Ein svært skuffa lensmann, og ein nøgd

– Eg meiner at Årdal er rette staden, men når andre meiner noko anna får eg halde meg til det og gjere det beste ut av det, seier Magne Knudsen.

I dag kom tilrådinga frå politimeisteren i Vest politidistrikt: I framtida skal det vere lensmannskontor i Lærdal som dekker kommunane Årdal, Lærdal og Aurland.

• Les også: Lærdal får lensmannskontoret

Trass argumenta blir dei lagt ned

– Årdal er den største kommunen og er større enn Aurland og Lærdal til saman. Vi har eit lokale som er ferdig og trafikken på E16 kunne vi greitt handtere frå Årdal, seier Magne Knudsen.

Knudsen viser til at det i Årdal er to industrisamfunn, Årdalstangen og Øvre Årdal. Han argumenterer også med at Årdal har større utfordringar med tanke på ruskriminalitet.

Politikontoret har vore kjent med beskjeden i om lag ei veke og det har vore ein smådeprimert lensmann i Årdal den siste veka.

– Vi må sette oss ned og sjå korleis vi kan løyse dette i fellesskap. Vi må gå vidare, vi kan ikkje gå i kjellaren, seier Knudsen.

• Les også: – Glad for tilrådinga frå politimeisteren

Skuffa årdølar

Dei NRK møtte på gata i Årdal er tydeleg skuffa over avgjerda, og meiner det vil gå på tryggleiken laus.

– Det er ikkje bra i heile teke. Då vil det ta lengre tid om ein treng politiet. Det hadde eg ikkje trudd. Vi er ei lita bygd og treng politi, seier Marianne Vikøren.

– Eg hadde rekna med kontoret skulle få vere. Nærleiken til eit slik kontor er veldig viktig, seier Harald Dalaker.

– Eg meiner det blir litt feil når vi har meir enn dobbelt så mange innbyggarar enn det er i Lærdal. Vi er rolege folk, men skjer det noko er det heilt klart at det er for store avstandar. I enkelte tilfelle går det på tryggleiken. Eg ser mørkt på dette, seier Torstein Egil Kvam.

Medan Årdal fortviler, jublar lensmannen i Bremanger

I motsetnad til befolkninga i Årdal, er det ein letta lensmann i Bremanger.

– Eg er veldig glad på Bremanger sine vegne. Dette er positive signal, seier lensmann Espen Gulliksen i Bremanger.

Han har vore sterk motstandar av politireforma heile vegen, og er nøgd med signala frå politimeisteren.

– Reforma ville gitt harde utslag i Bremanger. Vi ligg der vi ligg og verken geografi eller infrastruktur får vi gjort noko særleg med. Eg trur ikkje det blir så store endringar for vår del, og det er bra nok for oss, seier han.