Første april må det einaste overgrepsmottaket i fylket permittere tilsette, dersom dei ikkje får til ein ny avtale med kommune.
Sidan 2012 har mottaket teke imot, behandla og teke vare på valdtektsoffer og andre som er utsette for seksuell vald.
Kommuneoverlege og legevaktsjef Øystein Furnes i Førde seier det hastar å få på plass ein ny avtale med kommunane.
– Vi kan drive overgrepsmottaket ut mars månad, deretter må vi permittere våre tilsette.
Kommunane i fylket har til no ikkje klart å samle seg rundt den framtidige organiseringa av overgrepsmottaket. Kimen til usemje er at staten har vedteke ei ny ansvarsfordeling. Kommunane, ved legevaktene, har fått ansvaret for vald i nære relasjonar, medan sjukehusa skal ta seg av overgrepsoffer.
- Les også:
- Les også:
Fryktar for kompetansen
Furnes meiner oppdelinga ikkje er fornuftig og vil samle alt på dagens overgrepsmottak, som er lokalisert ved sjukehuset i Førde.
– Å ta imot ein person som er utsett for eit overgrep, anten vald i nære relasjonar eller seksuelle overgrep, er veldig tidkrevjande. Det krev også ein eigen kompetanse som går på rettsmedisin. Det har ikkje vanlege legar og sjukepleiarar, argumenterer Furnes.
Sjølv om denne kompetansen kan opparbeidast ved kvar enkelt legevakt eller legevaktsamarbeid, meiner Furnes mykje talar for å halde på dagens organisering.
– Vi er eit lite fylke. Statistisk sett er det 40–50 saker totalt i året som må inn til eit overgrepsmottak. Om det då er ulike legevaktlegar og sjukepleiarar som tek imot offera, så får ingen bygd erfaring. Du treng både opplæring og erfaring for å gjere ein god jobb.
- Les også:
Kan ikkje love noko
Sunnfjord-kommunane og fleirtalet av Sogne-kommunane er med på den nye organiseringa ved sentralsjukehuset. Nordfjordkommunane blir dermed tunga på vektskåla.
Hornindal har allereie sagt nei. I dag skal saka opp i formannskapet i Eid.
Furnes trur det kan bli vanskeleg å få dei andre kommunane til å gå inn med meir pengar, om nokre kommunar trekkjer seg ut. Avgjerda i Eid blir difor viktig.
– Vi må gjere ei heilskapleg vurdering på korleis vi løyser desse tenestene best, seier Venstre-ordførar Alfred Bjørlo.
Helse- og sosialutvalet si innstilling er at kommunen trekkjer seg frå dagens samarbeid. Bjørlo seier utgreiingar som ligg føre går for å løyse oppgåva lokalt.
– Dette av faglege omsyn som handlar om nærleik til tenestene og at ein får oppdaga overgrep tidleg og kjem tett på dei det gjeld.
Bjørlo vil ikkje forskottere kva formannskapet fell ned på. Saka skal endeleg avgjerast i kommunestyret neste veke.