– Hadde det vore noko glas i nærleiken, så ville det knust. Det var desibelnivå på skriking og mykje glede, latter og tårer. Ei enorm lykke rett og slett, seier trenaren til dei nybakte noregsmeistrane frå Florø, Anja Merethe Knudsen.
Under meisterskapet i korpsdrill i Larvik på laurdag, kunne jentene frå Florø Drill krone seg med tittelen noregsmeister i drill majorette. Jubelen stod i taket då Florøjentene vart kåra til vinnar.
Trenaren til drilljentene kjenner på ein lette etter helgas konkurranse.
– Eg er letta, så det er mykje glede og sveving i skyer. Dette har vi jobba så hardt mot med mykje beinhard jobbing.
Florø Drill har øvd på programmet sidan oktober 2015 etter førre EM, og målet for meisterskapet var heile tida klart.
– Kjensla var god etter at jentene var ferdig på golvet med programmet sitt. Vi ville behalde tittelen og få eit nytt uttak til EM, seier Knudson.
- Les også:
Eit tilbod utanom normalen
Drillmiljøet i Florø blomstrar, og trenaren legg vekt på at det er eit tilbod som skil seg ut frå andre fritidsaktivitetar i kystbyen.
– Drill er eit tilbod som kanskje går litt utover det vanlege. Dei som ikkje vil spele handball eller fotball får noko annleis. Det er ein veldig entusiasme blant både jentene og foreldra, seier Knudson.
Bak tittelen ligg det timevis med trening når 22 jenter skal vere samkøyrde, fortel Knudson.
– Det er så utruleg mykje hardt arbeid. To timar i vekedagane og mykje helgetrening. Både på eiga hand og saman for at jentene skal vere samkøyrde.
- Sjå Florø Drill opptre under førre EM:
Må i gong med dugnad
– Vi må nok jobbe ein del dugnad, og så håper vi på sponsorar sånn at eigenbetalinga for kvar utøver ikkje blir så stor, seier Knudson.
Jentene i Florø tek sommarferie, men før skulen tek til er treningane truleg allereie i gong att.
– Frå skulen byrjar er det eit hardkøyr fram mot oktober. Mogleg treningane er i gong allereie siste veka av sommarferien. No skal vi stå på og prøve på ein pallplass i EM i England, seier Knudson.