Dramatisk tilbakegang - så mykje har breane trekt seg tilbake

Det viser dei årlege målingane Norsk Bremuseum gjennomfører ved fire brear.

– Me kan ikkje trekkje konklusjonar ut ifrå ein sommar, men viss vi får fleire slike varme somrar og vintrar med lite nedbør på breane, så ser det dårleg ut, seier Pål Gran Kielland som er fagansvarleg ved Norsk Bremuseum.

• LES OGSÅ: Ventar stor tilbakesmelting av breane
• LES OGSÅ Nye varmerekordar over heile fylket

Dramatiske tal

For målingane dei har gjort i år er dystre:

• Store Supphellebreen minus 18 meter,
• Bøyabreen minus 65 meter,
• Vetle Supphellebreen minus 31 meter,
• og Haugabreen minus 13 meter.

Sjølv om trenden har vore nedadgåande dei siste åra, er det ekstra ille i år. Kielland liker situasjonen dårleg.

– Det er trist at det går den retninga. Vi vil jo at breane skal vakse og halde seg fine og store slik at vi får vist dei fram. Så det er ei trist utvikling, men det er òg spanande å sjå korleis eit varmare klima påverkar naturen vår, seier Kielland

• LES OGSÅ: Breane minkar, men turistane bryr seg ikkje

Turismen kan få lide

Han meiner det er dramatisk på fleire måtar, dersom breane skulle forsvinne heilt.

For det første vil reiselivet miste eit viktig trekkplaster. For det andre:

– Så er breane ein fin indikator på klimaet vårt. Viss breane minkar, så er det eit teikn på at klimaet blir varmare og varmare, seier Kielland.

– Er det noko vi kan gjere for å stoppe utviklinga?

– Det er jo det store spørsmålet. Men viss det er noko vi kan få gjort, så bør vi prøve, seier Kielland.