Askvoll kommune har mista mellom 70 og 90 industriarbeidsplassar dei to siste åra. Kultur- og næringssjef Per Arne Tveit samanliknar situasjonen med den i Flora, Høyanger og Årdal, som alle har fått store, statlege omstillingspakkar. Tveit trur småkommunane har vanskelegare med å nå fram og seier at det statlege verkemiddelapparatet i tillegg stadig vert stramma inn.
Nedleggingar
I løpet av dei siste to åra har viktige verksemder som Bru Fiskeindustri i Askvoll og Viking Global i Stongfjorden blitt lagt ned og flytta. I tillegg er det null aktivitet ved Klausen Mekaniske verkstad i Holmedal, og dei om lag 50 tilsette har vore utan arbeid det meste av året.
Reiseliv og sjøen
Reiseliv og maritimt næringsliv er satsingsområda for kommunen. Tveit seier det er avgjerande for småkommunane at Innovasjon Norge har midlar å dele ut til småbedriftene, og at det blir brukt pengar på infrastruktur.