Dei to mennene var 50 til 100 meter frå land, og den eldste på over 80 år greidde ikkje å kome seg opp att i båten.
Med éi åre og med mykje vatn i båten, padla den yngste til land.
Dramaet fann stad ved Bryggja i Vågsøy kommune i Nordfjord i 19-tida laurdag.
Trekke garn
Dei to eldre karane var ute for å trekkje garn då båten dei sat i kantra under sjølve garntrekkinga, ifølge politiet.
Begge karane enda i sjøen. Medan dei låg i vatnet, klarte dei å få båten på rett kjøl att. Den eine av dei to karane, den yngste, klarte deretter å kome seg opp att i båten. Men det greidde ikkje den eldste.
Operasjonsleiar Magne Faleide hjå politiet seier båten var halvfull av vatn og at den eine åra var vekke.
– Medan mannen over 80 hang over ripa, greidde den yngste å padle inn til land, seier Faleide.
Til legevakta
Politiet fekk melding via AMK.
– Dei to er sendt til legevakta på Eid. Dei var nedkjølte. Den yngste går det greitt med, mens han som låg lengst i vatnet er meir nedkjølt. Vi veit ikkje meir om tilstanden hans no, sa Magne Faleide hjå politiet.
Det var publikum som melde frå til AMK.