– Vi har gode syklar, og det har gått veldig fint. Det var mykje motbakkar frå Lindesnes til Flekkefjord og til Egersund, men så langt har vi tolt det, seier Signe Nordvik.
Ho og dottera har realisert draumen og syklar no saman i sju veker langs kysten av Norge. I dag var dei på plass i Florø for å feire Signe sin 60-årsdag. I dei åtte dagane dei no har vore på tur har dei merka godt den kalde våren.
– Det er faktisk vinterklede vi har sykla i, men no håpar vi at vi snart kan ta fram sommarkleda, seier Kari Nordvik Hauge (27) som til vanleg er sjukepleiar på Haukeland sjukehus.
- Les også:
Enkelte dagar har dei sykla etappar på nesten 12 mil. På Facebook-sida deira deler dei bileta frå turen.
– Ein får ei anna oppleving av landet og landskapet når ein sit på ein sykkel i forhold til det å køyre, fortel mor Signe.
(Artikkelen held fram under biletet)
EIGEN LOGO: Jakkene til dei to syklistane har teksten 'Frå sør til nord med mor'.
Foto: Stein Aase / NRKTøff mamma
Men det var ikkje gitt at det skulle bli sykkeltur på mor og dotter.
– I vinter skulle mamma absolutt køyre på det største hoppet i skibakken, og då landa ho på skuldra og måtte opererast for eit kragebeinsbrot, fortel Kari.
Trass brot i vinter har det gått bra på sykkelturen. Dotter Kari trur det handlar om at mora har ein enorm «stå-på-vilje».
– Eg beundrar ho for det. Så det er nok ein av grunnane til at eg vil ha ho med på tur. Ho er ei som toler mykje og klarar å motivere meg også, seier Kari.
Gler seg til midnattssol
Dei to er ikkje heilt sikre på korleis dei kom på å reise på langtur på sykkel.
– Vi begynte vel berre å snakke om at vi skulle gjere noko spesielt. Skitur på Grønland har også vorte diskutert, men så fann vi ut at vi skulle sykle. Og i år passa det godt, fortel Signe.
Dei starta på Lindesnes og skal ende turen på Nordkapp. Håpet er å få oppleve midnattssola.
- Les også:
- Les også:
Spør etter mannen i huset
Undervegs møter dei også folk, både kjente og andre som synest det ser spennande ut det dei held på med.
– Kva om noko skulle skje med syklane undervegs, punktere til dømes?
– Nei, då får vi sjå på Youtube kva vi skal gjere, spøkar Kari.
– Eg trur eg hadde gått opp til næraste hus og spurt om mannen i huset var heime, ler Signe.
Etter 60-årsfeiringa i dag går turen vidare i morgon.
– Eg merkar eg begynner å bli rastlaus etter å kome på sykkelen att. Det skal bli godt, seier Kari.