- Domstein fekk ein fantastisk pris

Austevoll Seafood kjøper 32,27 prosent av aksjane i storkonsernet. I tillegg til hovudkontoret i Måløy, har Norway Pelagic anlegg i Florø, Måløy, Selje og Kalvåg.

Dermed er det duka for nye endringar i verksemda som i mars i år kjøpte både Emy Fish og Brødrene Myhre i Måløy.

- Vi fekk eit godt tilbod som var 50 prosent over børsprisen, og det tykte vi var ein god pris, seier konsernsjef i Domstein, Rolf Domstein.

- Fantastisk pris

Med ein pris på 60 kroner per aksje, pungar hordalendingane ut med 303,2 millionar, skriv Hegnar Online. Austevoll Seafood kontrollerer med det 37,14 prosent av alle aksjane i Norway Pelagic.

Tradisjonsrike Domstein ASA i Måløy har vore største enkeltaksjonær med ein eigardel på 34,77 prosent. No sel selskapet seg heilt ut.

Tilbodet på 60 kroner aksjen, var 15 kroner over marknadsprisen, fortel finansanalytikar i DNB NorMarkets, Klaus Hatlebrekke.

- Prisen var fantastisk, seier han.

Spådd konkurs

For to år sidan spådde Hatlebrekke Domstein-konsernet konkurs i 2010.

• LES OGSÅ: Ekspert spår Domstein-konkurs

- Heldigvis har dei brukt tida godt til å strukturere om også den pelagiske konsumindustrien, og fått seld ut ein del eigardelar, seier Hatlebrekke og konstaterer at konsernet no er nærast gjeldfrie.

- Og då har dei moglegheit til å vere meir offensive enn dei har vore dei siste åra. Så det blir spanande å sjå kva ein skal bruke pengane til, seier han.

Planla ikkje sal

Domstein seier at dei ikkje hadde som mål å bli gjeldfrie då dei godtok tilbodet frå Austevoll Seafood. No ynskjer dei å bruke midlane på å satse vidare på ferdigvare, sal og marknadsføring av ferdigvare.

- Vi har ikkje lagt ut aksjane for sal, men i eit slik konsern vil vi til ei kvar tid vurdere å selje dersom vi får gode prisar, seier han.

- Sel godt produkt?

- Norway Pelagic gjekk bra i fjor. De fryktar ikkje at de sel frå dykk eit godt produkt?

• LES OGSÅ: Sild gav strålande resultat

- Norway Pelagic har hatt suksess sidan det vart etablert gjennom ein fusjon i 2007 og vi har framleis stor tru på selskapet. Men vi meiner det var rett å få inn ein annan hovudeigar.

Vil ikkje flytte

Norway Pelagic er rekna som verdas største selskap for sild og makrell. Konsernsjef Arne Møgster i Austevoll Seafood seier dei har følgd selskapet lenge og ser fram til å vidareutvikle selskapet.

Sjølv om Austevoll Seafood held til i eit anna fylke, har dei ingen planar om å flytte hovudkontoret frå Måløy.