Ein mann i midten av sekstiåra er i Sogn Tingrett dømd til 8 månadar fengsel og ei bot på 150 000 kroner etter at han over fleire år ikkje betalte skatt. I alt er mannen dømd for å ha unndratt 1 095 763 kroner.
Sogningen er sjømann og skal ha jobba på utanlandske skip i fleire år. Han skal over fleire år også ha fått løn utbetalt til ein konto i utlandet. Unndraginga heldt fram då mannen budde i Norge.
Ikkje einig i norske skattereglar
Politiet fann bevis på skatteunndraginga då dei ransaka bustaden hans. Der fann dei opplysningar om mannen si inntekt på fleire lønsslippar.
- LES OGSÅ:
Mannen skal ved to høve ha forklart seg til politiet på skatteundraginga. Han skal ha forklart politiet at han var djupt usamd i det norske regelverket om skatt. Mannen vedgjekk ikkje straffskuld for skatteundraging.
Skjerpande forhold
Retten finn det skjerpande at mannen har prøvd å skjule inntekta ved å la løna bli utbetalt til kontoar i utlandet. Sogningen har også latt vere å overføre pengar til norske kontoar, men heller betale med utanlandske kredittkort medan han var i Norge.
Etter at skattesaka vart sett under etterforsking og mannen vart meld for tilhøvet, har sogningen likevel fortsette å unndra skatt.
Mannen møtte ikkje i retten. Retten fann det i tråd med rettspraksis å dømme mannen til fengsel utan vilkår og bot.