– Det er antyda dom i rettssaka mot ACE (forsikringsselskapet til Terra Securities) før påske. I den andre saka mot Danske bank kan høgsterettsdommen koma om tre veker, seier rådmann Tom Joensen i Bremanger.
Bremanger, Vik og dei andre Terra-kommunane ventar i spenning på rettsavgjerdene, som kan gjera tapa etter dei ulykksalige investeringane i verdipapir på 2000-talet litt mindre smertefulle.
– I ACE-saka har me ein positiv dom frå tingretten, som me håpar me iallfall skal oppnå, seier rådmann Oddbjørn Ese i Vik.
- Les òg:
ACE-rettssaka
I ACE-rettssaka blei forsikringsselskapet i 2014 dømd til å betala Terra-kommunane 75 millionar kroner i erstatning, inkludert renter. Både forsikringsselskapet og kommunane anka, og i januar møttest partane på nytt i lagmannsretten.
– Legg me tingrettsdommen til grunn, kan det dreia seg om knappe 10 millionar kroner for Vik, så dette betyr mykje, seier Ese.
Striden med ACE handlar om forsikringar for to ulike år, til ein samla verdi på cirka 160 millionar kroner. Tingrettsdommen slo fast at Terra-kommunane skulle få erstatning for den eine forsikringa, men ikkje den andre.
Skulle Terra-kommunane få fullt medhald, kan Bremanger sitja att med oppunder 30 millionar kroner.
– Det vil endra kvardagen vår vesentleg, men det blir ikkje snakk om noko frislepp. Ein kommune har alltid press på økonomien, seier Joensen.
Danske bank-rettssaka
For Bremanger står endå meir pengar på spel denne våren: Kommunen har nettopp avslutta ei rettssak mot Danske bank i Høgsterett (16. til 18. februar).
- Les òg:
Tvisten handlar om såkalla derivatavtalar og er ei av forgreiningane etter Terra-saka, der Vik, Bremanger og fleire andre kommunar investerte i høgrisikable fondsprodukt med lån som hadde tryggleik i framtidige kraftinntekter.
I tingretten og lagmannsretten fekk Bremanger medhald, men Danske bank anka, og saka kverna seg difor opp til den øvste rettsinstansen. Vinn Bremanger fram i høgsterettsdommen, vil det bety mellom 110 og 120 millionar kroner mindre i gjeld.
– Det er vanskeleg å spå utfallet, men advokatane våre har gjort eit flott arbeid i desse sakene. Dessutan har me fleire positive dommar bak oss i underliggjande rettsinstansar, så me er nøkterne optimistar, seier Joensen, som var til stades under rettsforhandlingane i Høgsterett.
Viktig for resten av Terra-oppgjeret
Dommane i dei to rettssakene blir òg viktige for dei andre attståande oppgjera i Terra-saka:
- Terra-kommunane har framleis ein uløyst tvist med Terra Securities sitt andre forsikringsselskap AIG, som hadde styreansvarsforsikringa.
- Terra-kommunane har store krav i konkursbuet etter Terra Securities. Bustyrar Jon E. Skjørshammer har tidlegare sagt at han ikkje vil vurdera krava før det ligg føre rettskraftige avgjerder i dei pågåande erstatningssakene.
– Sannsynlegvis vil dommane leggja premissane for desse sakene som framleis ikkje er avklarte, så det er framleis mykje økonomi som me ventar spent på, seier Ese.
- Les òg: