Pliktoppfyllande innbyggjarar gir svært gode data - det blir lagt merke til internasjonalt

Forskingsmiljøa i fjordfylket kan nemleg skilte med eit svært tett samarbeid med mellom anna fleire offentlege institusjonar. På denne måten får dei tilgang på svært gode data.

Dette blir lagt merke til også utanfor Norge, og eit amerikansk forskarmiljø vil no samarbeide med Helse Førde på psykisk helse.

Forskingsleiar i helseføretaket, Marit Solheim, seier nettopp den gode tilgangen på data ligg til grunn for førespurnaden frå amerikanarane.

– Dei ser at vi får gode data frå den verkelege verda. Informasjonen kjem ikkje frå ein lab, men frå verkelege pasientar som feilar alt mogleg, og som ikkje berre har ein diagnose, seier Solheim til NRK.no.

– Eit pliktoppfyllande folkeslag

Saman med Helse Førde skal dei amerikanske forskarane utveksle pasientdata. Målet er å gje pasientar med psykiske vanskar betre behandling.

Det å bruke faktiske data, heller enn testar og forsøk, er viktig for forskarane når dei søkjer ny kunnskap.

For å få dette til samarbeider forskingsmiljøa i Sogn og Fjordane tett med skular, kommunar og andre offentlege organ.

I tillegg spelar innbyggjarane sjølve ei viktig rolle, seier Solheim.

– Folk her i fylket møter opp til kontrollar, og dei sender inn skjema slik dei skal. På denne måten er vi veldig skikkelege, seier ho og held fram:

– Ein annan ting er at folk bur her fast, noko som gjer at vi får data over tid.

• LES OGSÅ: Forskarar vil forandre undervisninga
• LES OGSÅ: Sel stadig meir av gamalosten frå Vik

– Eit ypparleg laboratorium

Forskingsmiljøa ved Høgskulen i Sogn og Fjordane, Helse Førde og Vestlandsforsking produserer stadig meir kunnskap.

I tillegg til eit pliktoppfyllande folkeslag som kjem med nyttige opplysningar, meiner Erik Kyrkjebø, viserektor for forsking og utvikling ved Høgskulen i Sogn og Fjordane, at det også er mange andre fordelar med å drive forsking lokalt.

– Sogn og Fjordane består av tre fjordar og folk her er litt skeptiske til folk utanfrå, og blandar seg gjerne ikkje så mykje. Slik sett er vi ei ganske homogen befolkning, og det gjer at ein kanskje kan sjå nokre særtrekk for fylket litt meir under eitt, seier Kyrkjebø.

– Nokre meiner vi er eit ypparleg laboratorium nettopp fordi vi har ei slik homogen befolkningsmasse, seier han.

• LES OGSÅ: Nei, det er ikkje tull - Knut har forska på mose-sex i mange år
• LES OGSÅ: No har forskarane bevist det - køyring på smale og svingete vegar forureinar meir

(Artikkelen held fram under)

Nyt godt av nært samarbeid med andre

Forskingsinstitusjonane samarbeidet tett med kvarandre, og mange av prosjekta inkluderer folk frå fleire av institusjonane.

Men noko av det unike i Sogn og Fjordane er at forskarane også spelar på lag med kommunar, skulevesen og andre, seier Kyrkjebø.

– Vi har eit samarbeid med både skuleverket, helsesektoren og mange andre rundt oss. Eg skal ikkje seie det er unikt, men det er veldig, veldig bra, seier Kyrkjebø.

– Det er slik at andre forskingsinstitusjonar kontaktar oss for å få gjennomført ein del forskingsprosjekt, fordi dei veit at vi har gode kontaktar i både skuleverket og andre sektorar. Dette er ein enorm fordel for oss, seier han.

• LES OGSÅ: Skulefag i Sogn vekkjer oppsikt
• LES OGSÅ: Får 30 millionar kroner til å forske på femteklassingane –

Eit konkurransefortrinn

Akkurat no prøver forskarar i fylket å finne ut kvifor elevane i Sogn og Fjordane gjer det så godt på nasjonale prøvar, og om det er samanheng mellom fysisk aktivitet og læring.

Dei fleste skulane i Sogn og Fjordane er involvert i prosjekta, noko som ikkje hadde vore mogleg andre stader, trur forskingssjefen.

– Vi har eit konkurransefortrinn fordi vi samarbeider med skuleverket, seier han.

• LES OGSÅ: Nei, det er ikkje tull - Knut har forska på mose-sex i mange år