– No er det ikkje mogleg for korkje brannvesen, politi eller ambulanse å kome fram, så vi er vel prisgitt Herren, seier Richard Schumann.
Han er i den vesle bygda Devik i Gloppen, og kjem seg ingen stader. Store tre har også teke med seg fleire høgspentlinjer, så bygda er utan straum.
– Vi har vore utan straum ei god stund, og det er dei også på Hestenesøyra, seier Schumann.
Det har ramla tre ned i vegen i alle fall tre stader. På fylkesveg 615 mellom Hyen og Hestenesøyra, mellom Devik og Sandane og i nærleiken av Kviteneset.
– Det er tale om veldig store ras. Heilt massivt, seier Schumann.
Jan Erikstad hos Vegtrafikksentralen i Lærdal kan stadfeste at vegen er stengd.
– Vi har ikkje fått beskjed om kor tid vegen vil opne, men det er folk på staden som jobbar med å rydde, seier han.
Håpar det ikkje skjer noko
I Devik bur det rundt ti menneske, og på Hestenesøyra rundt 90. Richard Schumann tykkjer ikkje det er kjekt at ei bygd med fleire eldre er heilt isolert frå omverda.
– Vi får berre håpe at det ikkje skjer noko, og at både veg og straum kjem tilbake så fort som mogleg.