Det seier Bjarne Nikolai Huus (23) om kjensla etter ein av dei største triumfane nokon gong av ein nordmann i internasjonal volleyball: amerikansk seriemeisterskap med Long Beach State.
Med nær 10.000 elleville supporterar på tribunane i Los Angeles. Mange av dei familie og vener frå Norge.
- Sjå: Dei elleville jubelscenene (ekstern lenkje)
– Det var heilt elektrisk. Du måtte skrike for å kommunisere med medspelarer og du høyrde ikkje beskjedane frå trenaren på sidelinja. Det var ei heilt ny oppleving, seier kantspelaren frå Førde.
– Utruleg stort
Huus er, etter det NRK kjenner til, den andre nordmannen som har klart denne bragda. Den første var Asbjørn Vølstad, også han frå Førde, for over 30 år sidan.
- Les også:
I tal utøvarar og land, er volleyball av dei største idrettane i verda. Berre Brasil har fleire OL-medaljar enn USA i volleyball og sandvolleyball.
– USA har vore i verdstoppen sidan 80-talet, og rekrutterer sine spelarar gjennom collegearenaen. Dei produserer spelarar av høgt internasjonalt nivå. Dette er utruleg stort, seier Vølstad.
Dramatisk kamp
Med berre eitt tap i serien gjekk Long Beach State til finalen etter å ha slått regjerande seriemeister Ohio State i semifinalen.
Finalen mot UCLA vart dramatisk. Med to sett i bagen, leia UCLA både 12–5 og 17–3. Kampen kunne blitt avgjort der.
I staden vann Long Beach State til slutt 3–2.
– Plutseleg stod vi der med pokalen over hovudet, seier Huus.
Har studert psykologi
Huus kunne ikkje fått ei betre avslutning på fire år med psykologistudium i USA. Dette er andre gongen colleget blir seriemeister. Sist, i 1991, var hovudtrenar Alan Knipe spelar.
Han er imponert over 23-åringen frå Norge.
- Les også:
– Bjarne er av dei mest hardtarbeidande eg nokosinne har møtt. Eg er så glad for at han nådde det ultimate målet gjennom dei fire åra han har vore her, seier Knipe.
– Eg har trena før folk har stått opp eller etter at dei har lagt seg. Å sitje her med trofeet på hylla gjer det verdt det, stadfestar Huus.
«This is for you dad»
Men seriemeisterskapen har ei betydning som betyr langt meir enn berre sportsleg suksess. Før to viktige kampar i februar, døydde far hans. Etter finalen skreiv han på Facebook «This is for you dad».
– Etter at far døydde har eg spelt sesongen for han. Han ville eg skulle lukkast med det eg dreiv med og fortalde meg alltid at å gjere noko «fullt og helt, ikkje stykkevis og delt», seier han.
– Det har eg tatt med meg vidare i alt eg gjer, seier Huus.