NRK.no fekk inn veldig mange gode bilete og videoar frå lesarane til konkurransen, og juryen hadde ingen enkel jobb med å finne dei aller beste bidraga.
1. Førsteplass i videokonkurransen
Langfredag var ein strålande flott dag for mange. Simon Sæterlid (25) frå Førde tok skia fatt og la ut på topptur - og det resulterte i ein flott video, som han sendte inn til NRK Sogn og Fjordane.
Juryen er samd om at dette var den beste videoen i konkurransen. Vi fekk påskekjensle og lyst til å gå på ski då vi såg filmen.
Simon Sæterlid får eit gåvekort på 2000 kroner i ein valfri fotobutikk i premie.
- Sjå videoen:
2. Andreplass i videokonkurransen
Då Magn Henning Helgås var på veg opp til Blåfjellet frå Innvik møtte han på ein sint, liten kar. Han rakk å ta fram telefonen og filme lemenet, og det var ikkje populært. Med telefonen berre 20 centimeter unna kjende dyret seg truleg truga og hadde ingen problem med å vise kva det meinte om filminga.
Juryen er samd om at dette er ein video mange vil like å sjå. Den er kort, men det er ikkje noko ulempe i denne typen innslag. Her har fotografen fanga situasjonen.
Magn Henning Helgås får ein NRK-ryggsekk med diverse NRK-effektar i posten som premie.
- Sjå videoen:
1. Førsteplass i fotokonkurransen
Biletet er teke av @papalapaa på Instagram, og syner ei kvinne på toppen av eit fjell i solnedgangen ved Lavikdal. Juryen er begeistra over stemninga i biletet. Lyset fell på ein flott måte over motivet.
Som premie for fotoet får vinnaren eit gåvekort på 1500 kroner i ein valfri fotobutikk.
2. Andreplass i fotokonkurransen
"ferydogfjas på Instagram har teke dette biletet, som syner veslemann i familien på tur saman med familien i påska. Juryen likar måten biletet fortel ei lita kvardagshistorie.
Vedstabelen dannar eit flott mønster i bakgrunnen, med gutungen som kontrast framfor.
Som premie for fotoet får vedkommande ein NRK-ryggsekk med diverse NRK-effektar i posten som premie.
NRK.no gjer merksam på at fotokvaliteten på skjermen ikkje er den beste, då dei fleste bileta i konkurransen er tekne med mobilkamera og lasta opp via Instagram.
NRK tek kontakt med vinnarane. I juryen som kåra dei beste bidraga sat redaksjonssjef Roy Raasholm Fauske og vaktsjef Rune Fossum.