Hyllestad, Høyanger, Vik og Årdal er blant 68 kommunar som må setje ned eigedomsskatten, dersom regjeringa får gjennomslag for forslaget om å redusere taket på kommunal eigedomsskatt frå sju til fem promille i statsbudsjettet for 2019. Det skriv Dagens Næringsliv. Til saman tapar dei fire kommunane 9 millionar kroner.
Bondelaget meiner at regjeringa ikkje tek matberedskapen på alvor i forslaget til statsbudsjett. Leiar i Sogn og Fjordane Bondelag, Anders Felde, etterlyser pengar til konkrete tiltak som skal gjere bøndene betre rusta til å møte eit villare klima.
Fylkesleiar i Senterpartiet, Sigurd Reksnes, fryktar at talet på trafikkstasjonar i Sogn og Fjordane kan verte redusert. Han syner til at regjeringa i forslaget til statsbudsjett har sagt at vegvesenet skal omorganiserast og at det skal sparast pengar, blant anna på å redusere talet på trafikkstasjonar. – Eg fryktar no at arbeidsplassar vert flytta ut av fylket nok ein gong, seier Reksnes.
– Dette er eit krevjande budsjettframlegg for Sogn og Fjordane fylkeskommune, seier fylkesordførar Jenny Følling (Sp) i ei pressemelding. – Eg håpar at stortingsfleirtalet vil styrke løyvinga til regional utvikling. Den har systematisk har vorte redusert siste åra. Fylka må få full kompensasjon for renter ved ferjeavløysing, og eg håpar på ei oppstartsløyving til museumsprosjektet Kløften ved Sunnfjord museum.
Regjeringa ønskjer å styrke satsinga på dei små nærbutikkane i distrikta. I forslaget til statsbudsjett føreslår dei å auke løyvingane til Merkur-programmet med nær 50 millionar kroner. Merkur er eit statleg utviklingsprogram som har som må å utvikle små butikkar i utkantane. I tillegg vil regjeringa heller ikkje gje fylkeskommunane ansvaret for denne satsinga, slik eit ekspertutval har føreslege.
