Desse opplever rekordbesøk

– Sommaren har vore veldig bra. Sesongen er enno ikkje over, men tala våre er gode og vi passerer nok fjoråret, seier leiar av Fortidsminneforeningen i Sogn og Fjordane, Jon E. Tamnes.

Fortidsminneforeningen eig fire av seks stavkyrkjer i Sogn og Fjordane, og for Tamnes er det gledeleg med nok ein rekordsommar.

– Det er veldig kjekt å slå rekordar, men det kjekkaste er at fleire vil oppleve dei flotte kyrkjene våre.

• Les også: Har passa på kyrkja i 35 år

– Vi klarar nesten ikkje å ta dei unna

Hopperstad stavkyrkje i Vik har til no hatt over 12.000 besøkjande.

Borgund stavkyrkje kan notere seg ein av sine beste sesongar så langt, til og med juli månad var det seld 26.000 billettar. Dette er 1300 fleire billettar enn på same tid i fjor.

– Det er ei stor auke i gjestar. Vi klarar nesten ikkje å ta unna, men det er berre gledeleg, seier dagleg leiar ved Borgund stavkyrkje- og besøkssenter, Tanna Gjeraker.

Let seg fascinere av trekyrkjene

Gjeraker merkar godt at stadig fleire har Borgund stavkyrkje på besøkslista når dei vitjar Noreg.

– Vi blir meir og meir ettertrakta. Omsetnaden har auka betrakteleg i år. Gjestane viser ei enorm glede over denne trebygningen.

- Fleire av gjestane våre kjem frå land som kanskje har mykje større og finare kyrkjer, men at våre er laga av tre har stor betydning. Det trur dei nesten ikkje på, seier Gjeraker.

Fleire turistar har også teke turen til Ornes og Urnes stavkyrkje. Der har sommaren vore travel.

– Vi har hatt 18.000 besøkjande innom fram til no i sommar, så det ser ut til at det blir ein rekordsommar. Fram til no ligg vi 830 besøkjande over det vi hadde på same tid som i fjor, seier tilsynshavar Marit Bøen.

Set ei grense for å unngå for tøff slitasje

Men besøksrekordar er ikkje berre positivt for kyrkjene. Ved Urnes stavkyrkje merkar dei slitasjen.

– Dørstokken og grunnstokken får meir slitasje, men vi set nokre grenser. Blant anna tek vi berre imot ei busslast om gongen, seier Bøen.

Ved stavkyrkjene blir det no jobba for å få utvida sesongen, dei ønskjer seg fleire besøkjande i mai og september.

– Kyrkjene er klenodium som skal takast godt vare på, så dette tek vi ikkje lett på. Vi følgjer situasjonen og har god kontroll på det, meiner Tamnes.

• Les også: Etter 60 år var skrifta frå fortida synleg igjen
• Les også: Stavkyrkjer kan bli stengde eller selde

Det er besøkjande frå alle nasjonalitetar som vitjar stavkyrkjene, men ein nasjonalitet glimrar med sitt fråvær.

– Nordmenn har ei innstilling om at kyrkja er fin og at den skal besøkjast når dei blir pensjonistar, men så skjer det aldri. Men fleire blir pensjonistar i framtida, så vi får håpe det endrar seg, smiler Gjeraker.