Skulle Eithun og Horrem ha sjanse til å kvalifisere seg måtte Norge sitt førsteranka lag, med Terje Skarlund og Martin Spinnangr, behalde sin 16. plass på OL-rankinga, skriv Aftenposten.
Men i den avgjerande verdsserie-turneringa i helga gjekk det gale og med minst mogleg margin vart laget dytta ned ein plass.
– Maksimalt uflaks
Dermed forsvann moglegheita for å kvalifisere seg direkte til OL ifølgje Aftenposten, og det får også konsekvensar for dei andre sandvolleyballaga.
No får verken Eithun/Horrem eller Hordvik/Høidalen høve til å spele om ein OL-plass. Det er no usikkert om Norge i det heile får lag i årets OL.
Elitesjef Jon Grydeland seier til avisa at dette er det verste han har vore med på i volleyballsamanheng.
– Det var vond å vere til stades. Det var maksimalt uflaks med alt, eigne marginar og trekninga for dei vi slåst mot, seier Grydeland til Aftenposten.
Brukar tusenvis på OL-satsinga
Draumen om OL har vore ei viktig drivkraft for Eithun og makkeren Iver Horrem. Då NRK snakka med Eithun i april fortalte volleyballspelaren at han ikkje hadde tort å rekne på kor mykje satsinga kostar.
– Eg torer ikkje rekne på kor mykje det kostar, for då ville eg fått dårleg samvit. Men det kostar nokre hundre tusen i året å drive oss som lag, sa Eithun til NRK.no.
Han var allereie då klar på at hovudmålet deira er OL i Rio i 2016, men at det samtidig var ein liten sjanse for at dei kunne kome seg til OL i London allereie til sommaren.
- LES OGSÅ:
- LES OGSÅ:
Blir viktige for Norge
Det blir altså ikkje noko tur til London for Eithun/Horrem. Men dei to får no ei viktig rolle for at Norge i det heile skal få med eit sandvolleyballag i OL.
Kontinentalcupen startar i Tyrkia fredag og det er den beste nasjonen som får ein OL-plass.
Norge stiller med laga Eithun/Horrem og Skarlund/Spinnagr og det har lenge vore klart at det er sistnemnde som får OL-plassen viss Norge skal sende noko lag.
Grydeland er trygg på at Eithun og makkeren vil gje sitt for å sikre Norge OL-plass.
– Dei er sjølvsagt skuffa over ikkje å kunne få slåst for eigen OL-plass, men dei er innstilt på å gje alt for at Norge skal få eit lag i OL, seier han til Aftenposten.
Dersom Norge ikkje blir best i Kontinentalcupen finst det ein siste sjanse. Grydeland seier til avisa at nummer to og tre går vidare til ei oppsamlingsrunde i Moskva, der dei spelar mot toarane og trearane frå dei andre kontinentpuljene. Dei to beste herfrå får dei siste OL-plassane-