– Dei var fine, seier vertinne på Eldalstunet, Marit Eldal, medan ho ser på dei nye gardinene som vert hengde opp.
Kvite stoff med nydelege mønster i blått prydar no Eldalstunet både på gardiner og dukar.
Eldal har vore spent på kva ungdommane ved Mo og Jølster kom til å komme opp med etter at dei vart utfordra.
Inspirasjon til mønsteret fann elevane i vertinna sitt utsal av rosemålte produkt.
Vertinna får sjølvsagt forkle med same design.
– Dette må eg bruke når eg serverer eller noko slikt, seier Eldal og ler.
Har brukt eit halvt år
I vel eit halvt år har elevane ved formingslinja ved Mo og Jølster vidaregåande skule jobba med dukane og gardinene.
Også dei tykte det var kjekt å sjå det dei har laga komme på plass der det skal vere.
– Det blei veldig fint med det blå i bakgrunnen. Det står veldig fint i lag, seier ein av designarane Marta Osland Lavik.
– Eg er veldig nøgd. Det er kjekt å få sjå resultatet på plass, seier Kine Leknes, som også har vore med og designa.
Og vertinna sjølv er svært nøgd over kva ho har fått i hus.
– Eg tykkjer det vart veldig fint. Veldig fine fargar var det også. Eg er svært nøgd, seier Marit Eldal.
(Artikkelen held fram under TV-innslaget)
Elevprosjekt gir kafé ansiktsløft
Kom i kontakt gjennom prosjekt
Elevane kom i kontakt med Eldalstunet gjennom prosjektet «På veg».
– På veg var eit prosjekt der seks vidaregåande skular i Førde-området var engasjerte. Hovudmålet var at elevane skulle få komme meir ut i distriktet og sjå moglegheiter og arbeidsplassar som kanskje er litt meir alternative, seier tidlegare prosjektleiar i «På veg», Anne Therese Kusslid.
Men prosjektet på Eldalstunet blir førebels det siste prosjektet av denne typen.
– Eg tykkjer det er litt synd. Eg trur elevane har godt av å komme seg ut og sjå korleis folk jobbar, seier Kusslid.
Også eldstegenerasjon på garden er nøgd med ansiktslyftinga som tunet no har fått.
– Det er flotte greier. Eg er heilt imponert. Eg hadde aldri venta det så bra som det vart, seier Einar Eldal.