NRK Meny
Normal

Vraka friidretten for å bli vektløftar – og då fekk ho fart på karrieren

FØRDE (NRK): Marit Årdalsbakke vart overrumpla over mottakinga ho fekk på heimebane – berre nokre år etter at ho kutta ut friidretten til fordel for vektløfting.

Marit Årdalsbakke tek 93 kilo i støt under EM

MIDDELS NØGD: Marit Årdalsbakke tok 93 kilo i støt under EM, men var berre middels nøgd med eigen innsats.

Foto: Rune Fossum / NRK

– Eg vart litt overvelda av trøkket der ute. Men eg klarte heldigvis å hente meg inn, seier Marit Årdalsbakke.

Ho fekk ingen god start på EM i vektløfting, då ho bomma på det første forsøket i rykk. For ho hadde nok ikkje trudd at publikum skulle vere fullt så entusiastiske.

Og ho skulle veldig gjerne ha sett nye personlege rekordar. Men slik gjekk det ikkje. Jølstringen enda med 83 kilo i rykk og 93 kilo i støt.

Gamletrenar såg potensial i vektløfting

Samanlagt endar ho truleg blant dei 20 beste løftarane i Europa i 63-kilosklassen. A-pulja skal i sving onsdag ettermiddag. Det må vere godkjent av 23-åringen, som inntil for berre få år sidan satsa på friidrett. Ho har NM-medalje i diskos for juniorar.

Bytet av idrett skjedde då Årdalsbakke fekk smaken på styrketrening.

– Eg såg ganske fort at ho hadde gode anlegg i vektløfting. Ho var smidig, hadde god motorikk og ei kroppsbygging som passa godt til vektløfting, seier Jørund Årdal.

Marit Årdalsbakke prøver seg på 100 kilo i støt. Klarer vendinga, men klare rikkje overstøtet.

NESTEN 100 KILO: Marit Årdalsbakke prøver seg på 100 kilo i støt. Ho klarer vendinga, men må gi opp i overstøtet. Foto: Rune Fossum

Angrar ikkje på at ho byta

Årdal var trenar for Årdalsbakke då ho satsa på friidrett. Då kastarane i Gloppen byrja med styrketrening, vart dei også med på eit julestemne i vektløfting i Naustdal. Då var gneisten tend. Årdalsbakke kvalifiserte seg like godt til NM.

– Ei stund jobba eg parallelt med begge idrettane. Så fann eg ut at eg ville satse vektløfting. Det var der eg hevda meg best, seier ho.

– Eg angrar ikkje på det. Eg har fått mange store opplevingar med vektløfting, og dette er min andre store internasjonale konkurranse. Det er veldig kjekt, seier Årdalsbakke.

Marit Årdalsbakke og trenar Gunnar Reiakvam

GIRA: Marit Årdalsbakke og trenar Gunnar Reiakvam før 23-åringen skal ut og gjere støt i EM på heimebane.

Foto: Rune Fossum / NRK

– Hadde vore stort å vere med i OL

Også gamletrenaren meiner valet av idrett var til det beste.

– Eg såg tidleg at ho kunne bli god, spesielt i rykk. Dessutan er det er ein fordel med lange armar i diskos. I vektløfting er det nesten motsett, smiler Årdal.

No er 23-åringen frå Jølster motivert for å halde fram satsinga på toppnivå.

– Vi får sjå kva framtida bringar. Det kan kanskje vere realistisk med OL om fire år. Det hadde vore stort. Men vi får sjå korleis motivasjonen held seg, seier Årdalsbakke.

Den nye regjeringa vurderer å kvitte seg med odelslova. Det kjem ikkje på tale, svarer bøndene.
Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.