Fem lag med like mange poeng - denne steinen avgjorde Klassequizen

Sidan nyttår har Klassequizen vore på turné på kryss og tvers, og besøkt 30 ulike skular i nesten alle kommunane i fylket.

• Her finn du alt om Klassequizen

Imponert over elevane

Klassequiz-general Erlend Blaalid Oldeide seier han har blitt teken godt imot på skulane har han besøkt og er imponert over elevane.

– Dei har øvd på førehand, har nervar i heilspenn og så presterer dei bra. Eg tykkjer laga i Sogn og Fjordane har gjort det godt. Nokre tykkjer eg har vore streng og myndig, men eg har reglar eg må følgje, seier han.

Etter at 30 lag frå like mange skular har fått prøve seg, stod fem lag med 11 poeng. For å kunne skilje lag med like mange poeng, hadde Oldeide med seg ein stein som vart lag måtte tippe vekta på medan han besøkte dei.

• LES OGSÅ: Kor god er Klassequiz-generalen?

Slik tippa laga

Kjell Arvid Stølen i NRK har halde oversikta over poengsummen til dei ulike laga. Han har også kontroll over kva vekt laga har gjetta.

– Vi har fem lag med like mange poeng, men berre fire blir med i fylkesfinalen. Difor må ein stein avgjere kven dei fire heldige er.

Dette er vekta dei fem beste laga tippa på steinen:

• Flora ungdomsskule – 3335 g
• Farnes skule, Årdal – 2261 g
• Stryn ungdomsskule – 957 g
• Davik oppvekstsenter, Bremanger – 878 g
• Halbrend skule, Førde – 1452 g

• LES OGSÅ: Førde ungdomsskule vann Klassequizen

Desse skulane går vidare

Kjell Arvid Stølen legg steinen på den grå vekta som står i studio. 1573 gram viser displayet. Dermed er det klart kven som går vidare.

– Halbrend var nærast med eit avvik på 121 gram. Dei tre andre skulane som kjem til fylkesfinalen er Farnes skule, Stryn ungdomsskule og Davik Oppvekstsenter. Flora ungdomsskule hadde det største avviket og endar på 5. plass, seier Stølen.

No blir dei fire beste laga samla for å kåre ein fylkesvinnar. Det skjer i lokala til NRK Sogn og Fjordane fredag 21. mars, direktesendt i ettermiddagssendinga. Det aller beste laget får reise på innspeling i Oslo under den nasjonale finalen i mai, send på NRK 1 laurdag 10. mai.

– Eitt lag frå kvart fylke skal kjempa i den store finalen. Kan vi få ein siger til Sogn og Fjordane denne gongen? spør Erlend Blaalid Oldeide.