– Vi har hatt den første frostnatta fleire stadar, seier meteorolog Geir Ottar Fagerlid.
Heile Sør-Noreg kan gle seg over ei solfylt, kald og klar helg, men ute på vegane i midtre og indre strøk lurer farane. No ber Meteorologisk institutt alle om å vere merksame på nattefrost.
Ei frostnatt er ei natt der temperaturen fell under 0 grader, noko som kan kome brått og overraskande på bilistar som er ute på vegen seint eller tidleg.
Laurdag morgon køyrde ein bil ut av vegen mellom Olden og Innvik etter at føraren mista kontrollen i ein glatt sving. Politiet kunne melde om såpeglatte vegar på fv. 60 i Nordfjord.
Etter ei utforkøyring fredag kveld kom politiet med ei oppmoding til bilistane i Møre og Romsdal om å køyre forsiktig.
– Det kan fort danne seg is på vegane som gjer at ein får glatte parti, seier Fagerlid.
– La bilen stå
Lurer du på om du skal byte til vinterdekk på bilen? Meteorologen ville ikkje gjort det heilt enda. Han ber deg heller om å la bilen stå i helga.
– Viss du kan la bilen stå på morgonkvisten, så treng du ikkje byte til vinterdekk dei neste dagane. Det er venta eit lågtrykk i neste veke som har med seg høgare temperaturar, seier Fagerlid.
Det er store lokale forskjellar på temperaturane. På kysten og langs fjordane er det ganske mildt. Meteorologen trekkjer fram Kråkenes i Nordfjord. Ved Kråkenes ute ved kysten var lågaste temperatur natt til laurdag 7 grader, medan det har vore minus fleire stadar i midtre og indre deler av Sør-Noreg.