Medan dei andre avisene i Sogn og Fjordane gjennomsnittleg reduserte opplaget med 290 eksemplar frå 2013 til 2014, opplevde Ytre Sogn Avis ei auke på 22.
– Viss det er nokon hemmelegheit bak suksessen, så er det at det er om å gjera å vera så lokal som mogleg, avslører Rune Sviggum, redaktør i Ytre Sogn Avis.
- Les også:
- Les også:
Krevjande å driva avis i Høyanger
Ytre Sogn Avis har hatt stabile opplagstal dei siste sju åra. Dei dekker kommunane Balestrand, Hyllestad, Gulen, Solund og Høyanger.
– Me prøver å dekka flest mogleg arrangement. Alt frå konsertar til basarar. For det er plassar der folk er, og då har dei sjølvsagt interesse av å sjå bilete av det, legg Sviggum til for å forklara suksessen til avisa.
Redaksjonen har tilhald i Høyanger, ein stad som har hatt sterk nedgang i folketalet dei siste ti åra. Kommunen sitt folketal har minka mykje meir enn i andre kommunar i Sogn, ifølgje ein rapport frå Telemarksforsking frå 2012.
– Det er naturleg å tru at me missar lesarar på at folk reiser frå kommunen. Men forhåpentlegvis er det nokon som tar med seg avisa sjølv om dei flyttar, seier Sviggum.
- Les også:
Trufaste lesarar
Folk på gata i Høyanger er stort sett positive til avisa, sidan den dekker lokalsamfunnet på ein god måte. Mange meiner dei er flinke til å få fram det som skjer i lokalmiljøet.
– For meg er det ei veldig god avis, fordi eg synast det er veldig viktig å ha ei lokalavis der eg kan lesa om det som skjer i området, forklarer Vigdis Olsen.
Samtidig er det enkelte som hevdar avisa lever på det dårlege samvitet til abonnentane.
– Kvifor trur du Ytre Sogn Avis gjer det så bra?
– Det er vel medkjensle til avisa, for å halda ho i gang her i Høyanger, seier Kåre Lønne.