NRK Meny
Normal

Den gamle keeperkjempa får vakte noko spesielt

– Det er ærefullt, seier Frode Grodås. Han er Fotballforbundets «kurer» når det synlege beviset på at Sogndal er seriemeister, i dag blir frakta til saftbygda.

Frode Grodås og Yngve Hallén på Fosshaugane.

ÆREFULLT: Frode Grodås (t.v.) tykkjer det er stas å vere NFF sin kurer når pokalen for seriemeisterskap skal fraktast til gamleklubben Sogndal. Går alt etter planen overrekkjer fotballpresident Yngve Hallén pokalen på søndag.

Foto: Oddleif Løset / NRK

Med seks poeng – og 17 plussmål – å gå på, er sjansen lik null for at Brann skal stikke av med «bøtta» som seriemeister i 1. divisjon. To kampar er att av sesongen.

Pokalen som Sogndal Fotball får søndag 25. oktober 2015

POKAL: Dette er pokalen som årets serievinnar i 1. divisjon får. I helga er den i Sogndal.

Foto: Privat

Pokalen blir i dag frakta frå Oslo mot premieskåpet på Fosshaugane i Sogndal. Med tidlegare Sogndal-keeper, Frode Grodås, som fraktar og vaktar.

– Det blir hyggeleg. Det er stort og godt det dei har gjort. Det er godt den hamna der, humrar Grodås.

Hallén overrekkjer

Grodås er fagutviklar i Norges Fotballforbund, og far til Sogndal-back Victor Grodås. Etter planen overrekkjer fotballpresident Yngve Hallén pokalen etter søndagens oppgjer mot Sandnes Ulf. Slik som han gjorde i 2010.

Lagbilete Sogndal - seriemeister førstedivisjon 2015

SERIEMEISTRAR: Sogndal er definitivt blant eliteserielaga som startar sesongen 12. mars 2016. Spørsmålet er om dei får trofeet som seriemeister i helga, eller om dei må vente til etter bortekampen mot Levanger.

Foto: Christian Blom / NRK

Eitt poeng mot Sandnes Ulf, eller poengtap for Brann, gjer at ikkje ein gang teorien kan ta frå Eirik Bakke & co. seriemeisterskapen.

Skulle derimot Sogndal tape mot rogalendingane, og Brann vinne mot Nest-Sotra, får ikkje sogningane pokalen før neste helg.

– Ein premie i idrettskonkurranse bør i prinsippet skje når konkurransen er slutt, og det er heilt avgjort, seier Dag Vestlund, arrangementssjef hos NFF.

Håpar på 3 500 tilskodarar

Geir Inge Heggestad

3 500: Arrangementssjef Geir Inge Heggestad i Sogndal håpar overrekkinga av pokalen vil trekkje mange tilskodarar til Fosshaugane.

Foto: Heidi Lise Bakke

– I fotball kan vi ha ein vinnar med ein, to, tre eller fire kampar att. For å få litt stas rundt overrekkinga, skal den skje på heimebane så seint som mogleg. Difor blir det ikkje heilt feil å dele ut pokal til Sogndal i deira siste heimekamp, held Vestlund fram.

Arrangementssjef i Sogndal Fotball, Geir Inge Heggestad, håpar på mykje folk og ei flott ramme søndag ettermiddag.

– Eg håpar og trur på 3 500. Det er Bendit Cup med 1 100 spelarar i helga, så det blir mykje folk. Trofeet blir toppen av kransekaka denne helga, seier han.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.