Ikkje stol på Ellen Hambro, sa demonstrantane

Det var Natur og Ungdom, Naturvernforbundet som saman med Vevring og Førdefjorden Miljøgruppe arrangerte demonstrasjonen framfor Stortinget tysdag kveld.

Deira bodskap til politikarane var: – Det er ikkje for seint å snu, redd Førdefjorden!

– Berre tull

Mellom demonstrantane var ei gruppe frå Nesodden, dei kalla seg Nesodden innbyggerinitiativ. Dei var ikkje nådige i sin kritikk mot direktør Ellen Hambro i Miljødirektoratet.

– Det er ingen grunn til å stole på Ellen Hambro. Ho vinglar i Førdefjorden, ho vingla veldig i Bøkfjorden ved Syd-Varanger gruver. No vedgår ho at det er altfor mykje kvikksølv i torsk i indre Oslofjorden. Vi kan ikkje bruke henne som fagleg garantist når det gjeld Førdefjorden, det er berre tull, sa Knut Chr. Hallan.

Gruppa har vore engasjert i gruvesaka i Sunnfjord sidan vedtaket i regjeringa kom.

– Det var høgst overraskande at regjeringa sa ja til eit bittelite gruveselskap som berre er interessert i å skaffe seg pengar på børsen. Dei kjem til å selje det heile til kinesarane, og så set dei norsk lakseeksport på prøve. Saka er frykteleg dårleg, det trur eg Erna Solberg må få med seg snart, seier Hallan.

• Les også: 1150 vil lenkje seg fast i protest mot fjorddeponi
• Les også: 1. mai: Padla i protest mot fjorddeponi
• Les også: Fjorddeponi skremmer ikkje vekk turistar, trur forskar

Vil heim til Sunnfjord, men...

Inger Fure Grøtting frå Førde sa frå talarstolen at ho har eit ynskje om ein dag å flytte heim til Sunnfjord.

– Den dagen gler eg meg veldig til. Men vi ynskjer ikkje politikarar som manglar respekt for kunnskapsgrunnlaget og klare råd frå fag- og forskingsinstitusjonqar. Vi vil ikkje ha politikarar som ikkje bryr seg om naturen, som ikkje har respekt for naturen og ungdommen. Vi ynskjer oss eit berekraftig grønt framtidsfylke, ein heimplass vi kan halde fram å vere stolte av.

Stortingsrepresentant Rasmus Hanssom frå Miljøpartiet dei grøne gav vedtaket om fjorddeponi det glatte lag og hausta applaus for denne kraftsalven.

– Eg har jobba med natur og milljøvern sidan 1970, og dette vedtaket om å dumpe 250 millionar tonn gruveslam i Førdefjorden er det dummaste vedtaket eg har opplevd i heile den perioden.

Innimellom appellane varta Jorunn Torsheim opp med «Å Vestland, Vestland» og Fridtjov Urdal bidrog med sitt niddikt mot gruveplanane.