Det er delte meiningar etter at pasientombodet i Sogn og Fjordane, Ove Mjåtveit, tek til ordet for å endre namnet «Helse Førde» til «Sogn og Fjordane Helseføretak».
Sjukehusaksjonist Jan Eide meiner skaden allereie har skjedd, og at ei namneendring kjem for seint.
- LES OGSÅ: – Helse Førde-namnet ein tabbe
– For meg spelar det inga rolle. Dei har øydelagt heile greia, og då er det ikkje hjelp i å få vekk Førde-namnet sjølv om det er belastande, seier han.
– Provoserande
Det er i årsmeldinga at pasientombodet føreslår å endre namnet. Det har storma kring helseføretaket og Sunnfjord-regionen i samband med omlegginga.
Ei namneendringar har også tidlegare vore vurdert.
– Eg føreslår å kalle det «Sogn og Fjordane Helseføretak». Det fylket som føretaket skal levere tenester til. Eg trur også at «Helse Førde» er provoserande for mange, seier Mjåtveit.
– Kan vere samlande
Hotelldirektør Odd Erik Gullaksen ved Rica Sunnfjord Hotell lever av å trekkje folk til Førde. Men ynskjer velkomen at helseføretaket med hovudsete i byen hadde kvitta seg med namnet.
Gullaksen trur ei namneendring kan virke samlande.
– Det som er viktig er at namnet på helseføretaket vårt ikkje skaper stridar innanfor fylket, seier han.
Vil koste
Nyvald styreleiar i Helse Førde, Jorunn Ringstad ynskjer ikkje å kommentere pasientombodet sitt namneforslag.
Nestleiar Knut Cotta Schønberg seier det er naturleg at styret gjer seg opp ei meining når årsmeldinga frå ombodet kjem opp i styret.
Ei namneendring vil koste pengar, og ein må i så fall vurdere om det er rett pengebruk.
Lite å seie
Etter ein årelang strid om sjukehustenestene i fylket, vedgår Eide i Nordjford at han har irritert seg over Førde-namnet.
No har sjukehuset bore namnet i 11 år, og han har lita tru på at det vil skje noko revolusjonerande med eit nytt namn.
– Slik eg ser det, så går det mot eit lokalsjukehus i førde og nedlegging av resten, seier han.