Ole Trovåg og Pål Thomas Sandahl er med den garva fiskaren Roar Trovåg. Saman førebur dei sommarsesongen på Nåra i ytre Sula. Dei skal ut på teinefiske i ein liten blåmåla båt.
– Vi skal fiske krabbe som vi seinare skal bruke til teinemat når vi skal fange leppefisk, fortel Roar.
Leppefisken skal seljast til oppdrettsnæringa, som brukar den i kampen mot lakselus.
- Les også:
- Les også:
KRABBEFISKE: Ole Trovåg slenger ut ei av teinene.
Foto: Harald Kolseth / NRKEndeleg lærling
Pål Thomas Sandahl er frå Bjorøy ved Bergen og har gått utan læringsplass i tre år. No er Trovåg godkjend som lærebedrift, og Pål Thomas kan omsider kalle seg lærling.
– Her er det flott. Eg var med litt i haust på krabbefiske, det var kjekt. Eg har gått dei skulane eg treng, no tek eg læretida.
LÆREMEISTER: Roar Trovåg (t.v.) skal lære det han kan om teinefiske til sonen Ole (t.h.) og Pål Thomas Sandahl.
Foto: Harald Kolseth / NRKDrøymer om eigen båt – ein gong
Ole Trovåg er sonen til Roar. Han har gått på skule i Austevoll, på fiske og fangst. No går han første året på styrmannsskulen.
– Eg skal bli fiskar, eg håpar at eg ein dag kan bli skipper.
Og han er ikkje den einaste ungdommen i Solund som har slike planar.
– Det er fleire på min alder som prøver å satse litt, men det er vanskeleg å skaffe pengar til å investere i det ein treng når ein er ung. Men draumen er ein gong å ha eigen båt.
Tidleg krøkt
Roar Trovåg vedgår at han kan ha medverka til at sonen vel same yrket som han sjølv.
– Han var ikkje mange år første gongen han var med på sjøen då vi reiste på større båtar. Han var klar, han, veit du, han sat i styrehuset med meg.
No er dei klare til å sette i gang med teinefiske, og Roar er glad han har ung og arbeidsviljug arbeidskraft.
– Mannskap må vi ha, og det er mange som har sagt seg viljuge til å stille opp, så det er bra.
