Dei lokale OL-håpa skaut seg vekk

Unge lovande skiskyttarar, supporterar og klubbleiing i Markane hadde alle samla seg for å heie fram dei lokale OL-heltane. Men Bø-brørne som sjølv har gått for Markane fekk det ikkje til under dagens sprintøving i OL.

– Ole Einar begynte veldig bra, så då steig stemninga. Men den vart litt meir redusert når våre eigne kom og ikkje gjorde det så godt, seier Monica Halsteinslid som er leiar i skiskyttargruppa i Markane idrettslag.

• LES OGSÅ: – Har ikke gjort annet enn å trene, hvile og spise det siste året

39. og 55. plass til Bø-brørne

For verken Tarjei Bø eller Johannes Thingnes Bø hadde dagen framfor skivene. Med tre bom enda storebror på 39. plass, medan veslebror fekk fire bom på standplass og noterte seg med ein 55. plass i sitt aller første OL.

Halsteinslid seier det var ingen på klubbhuset som deppa, sjølv om dei naturleg nok vart skuffa på vegner av dei lokale stjernene.

– Skiskyting er vanskeleg. Ein skal ha dagen både i løypa og i standplass. Og så må vi hugse på at det er mange fleire moglegheiter, seier ho.

Det er også det ordførar Sven Flo trekkjer fram etter dagens sprintøving.

– Vi skal ha ein samanhengande fest vi no, lovar han.

• LES OGSÅ: Slik skiller det norske laget seg fra konkurrentene
• LES OGSÅ: Norsk gulloppskrift: Holde seg våkne halve natta

(Artikkelen held fram under)

Skal samle seg gjennom heile OL

Dagens 10 kilometer sprint er den første øvinga for skiskytterherrene. Måndag er det jaktstart, medan det torsdag følgjer opp med 20 kilometer, før det er 15 kilometer fellesstart på søndag.

Onsdag 19. februar er det mixed stafett der det kan vere sjansar for eit blad Bø på laget, og laurdag 22. februar er det 4X7,5 kilometer stafett for herrar.

Halsteinslid seier dei kjem til å prøve å samle seg for å få med seg fleire av øvingane, og seier det er moro for både store og små. Spesielt dei unge som har starta med skiskying gler seg over å følgje heltane på TV.

– Dei synst det er kjempekjekt. Dei ser at det går an å kome langt sjølv om ein kjem frå ein liten plass, seier ho.

Gler seg over norsk gull

Det siste året har dei hatt ein veldig auke i talet på skiskyttarar, og leiaren fortel om 14–15 nye løparar i alderen 8 år og oppover.

– Det er veldig bra for rekrutteringa, seier ho.

Det vart uansett norsk gull i dei russiske løypene. Ole Einar Bjørndalen hadde dagen både i sporet og på standplass, og vann sitt tredje OL-gull på distansen.

– I dag gler vi oss over norsk gull, så gler vi oss til fortsettinga, smiler Halsteinslid.

• LES OGSÅ: – Har ikke gjort annet enn å trene, hvile og spise det siste året