- Den nye informasjonen som kjem no må regjeringa ta opp til vurdering. Eg kjem til å stille spørsmål til statsråden om den nye kunnskapen om nanopartiklar. Eg forventar at regjeringa tek inn over seg det som har kome fram, og at det blir ein del av kunnskapsgrunnlaget når ein skal vurdere å gje konsesjon til gruvedumping i Førdefjorden, seier stortingsrepresentant for Venstre, Sveinung Rotevatn.
Han og partiet er uttalte motstandarar av sjødeponi i Førdefjorden i samband med løyvet til gruvedrift for utvinning av mineralet rutil i Engebøfjellet. Saka er omstridd, og fleire utgreiing ligg allereie på Miljøverndepartementet sitt bord, som no har saka oppe til vurdering.
Frå hav- og fiskenæringa får motstandarane støtte i sitt syn, medan det frå næringshald er sett langt meir positivt å få gruveverksemda i drift, og slik skape fleire og varige arbeidsplassar i Naustdal
• LES OGSÅ:
• LES OGSÅ:
– Den nye informasjonen ein har no skaper på ny uvisse rundt dumping av gruveavfall i Førdefjorden. VI veit allereie mykje, og bør no vere endå meir uro. Den nye kunnskapen bør ein definitivt ta med seg når ein skal vurdere miljøkonsekvensen av gruveutslepp, seier Rotevatn.
Små bitar som kan gjere stor skade, meiner forskarane
Også Naturvernforbundet ropar varsku om den nye forskinga som no ligg på bordet.
– Dei giftige partiklane kan lett bli tatt opp av ulike fiskar og andre artar som lever i fjorden. Det er stoff som er vanskeleg å bryte ned, og som kan hope seg opp i næringskjeda, og som har ulik giftpåverknad på dei levande organismane, seier leiar i Naturvernforbundet, Lars Haltbrekken.
Forbundet har vore av dei krassaste kritikarane i saka om gruvedrift og sjødeponi i Førdefjorden. Og no har dei funne støtte i saka si frå nytt hald. Nanopartiklane er bittesmå partiklar som blir danna når ein knuser fjellet. Utsleppa frå gruva kan innehalde til dels store mengder slike bitar, og sjølv om dei er bittesmå, så kan dei ha giftig påverknad på livet i fjorden, meiner forskarar.
• LES OGSÅ:
Ny forsking, også for naturvernarane
Naturvernforbundet meiner forskingsfunna er så alvorlege at dei i seg sjølv vil vere nok til å seie nei til lagring av gruveavfall i fjorden.
– Dette er forsking vi har kome over dei siste vekene, og vi har sendt brev til styresmaktene og håpar dei tek seg tid til å sjå på dette før dei fattar vedtak. På bakgrunn av dette, og alt det andre ein veit om konsekvensane for fjordane, så bør ein seie nei til å bruke Førdefjorden som avfallsplass for gruveindustrien. Ein må i alle fall få greia ut konsekvensane grundig før ein fattar avgjerd, meiner Haltbrekken.
Prosessen kring Engebøfjellet og sjødeponi har vore lang, noko også Rotevatn er klar over. Likevel meiner han det er viktig å ta med dei nye funna.
– Eg trur det er klokt å få eit svar snart, og det bør bli avslag på konsesjon. All ny informasjon taler mot at det er trygt å dumpe avfall i Førdefjorden. Skal ein ta føre-var-prinsippet på alvor, og det bør vi, så bør ein med den informasjonen ein har, ikkje seie ja.