Det seier Håkon Mallasvik og får samtykkande nikk frå medeleven Christine Flo Nydal.
Dei to åttandeklassingane meiner milliongåva frå Trond Mohn, betyr mykje for langt meir enn berre idretten i Jølster.
– Eg trur det blir mykje betre å komme hit, når folk ser at ein kan vere aktive heile året, seier Mallasvik.
Måtte roe seg ned
Det er måndag, men på langt nær noko blåmåndag i Jølster. Under folkemøtet om den planlagde fotballhallen på Skei, sleppte Nils-Einar Kjøsnes ei nyhende som slo ned som ei bombe - med positivt forteikn.
Den bergenske milliardæren Trond Mohn løyver ti millionar kroner til bygginga av fotballhallen. Det doble av det arbeidsgruppa, som Kjøsnes er med i, søkte om.
Det var Firda som først omtala milliongåva.
– Eg vart heilt skjelven då eg fekk telefonen. Eg måtte stoppe opp og roe meg ned før eg kunne køyre vidare. Det var heilt fantastisk, seier Kjøsnes og vedgår at det vart vanskeleg å halde på løyndomen frå torsdag til søndag.
– No slår alt inn
Gåva kom på eit gunstig tidspunkt. Planane er skalert ned for å møte kalkylen på 46,6 millionar. Etter anbodsrunden var lågaste tilbod på kring 68 millionar kroner.
– Vi tok vekk serviceanlegg og garderobeanlegg. No slår alt inn og vi er tilbake til det opphavlege, seier Trond Dvergsdal, også han medlem av arbeidsgruppa.
Arbeidsgruppa er optimistiske med tanke på å få inn dei siste 2,8 millionane som trengst.
– Det er veldig gledeleg, seier Dvergsdal.
– Naudsynt hall
Laila Tefre Dvergsdal, leiar i Jølster Idrettslag, seier hallen eigentleg har hengt i ein noko tynn tråd siste tida. Milliongåva frå ein raus bergensar varmar difor meir enn ein skulle tru.
– Det betyr at vi får ein komplett hall, med garderobeanlegg, fotballbane i komplett storleik og ein mindre klatrevegg. Det er naudsynt for idrettslaget og for Skei skule, seier ho.
– Hallen betyr mykje for å utvikle Skei som buområde. Den er eit næranlegg for Skei, men samstundes ligg vi midt i fylket og det er enkelt og kort tilkomst for andre, legg Kjøsnes til.
Under folkemøtet søndag vart hallen skildra som ei storstove for Skei.
– Den blir eit samlingspunkt for bygdefolket, og her kan foreldre komme innom for ein kaffikopp medan borna er på aktivitet. Eg trur hallen vil samle veldig mykje folk, seier Tefre Dvergsdal.
– Heilt fantastisk
Gleda jølstringane kjenner på, har dei også kjent i Tambarskjelvar, Sogndal Fotball og Langeland skisenter.
Den rause bergensaren har løyvd mange millionar til idretten på Vestlandet. Også her i fylket:
– At ein person kan vere så gåvmild ovanfor oss her oppe, er heilt fantastisk, avsluttar Tefre Dvergsdal.