– Tre personar er henta ut av ambulanse, og blir sendt vidare til behandling på sjukehus. Det blir framleis jobba med å få ein person laus, sa Arve Samsonsen ved politiet sin operasjonssentral søndag føremiddag.
Klokka 15:30 Helse Førde melder at to kvinner fødde i 1961 og 1966 er kritisk skadde. Klokka 19.48 melder Helse Førde at dei to kvinnene er overførte til Haukeland Universitetssykehus med luftambulanse. To menn, som er fødde i 1959 og 1963, er alvorleg skadde.
Politiet seier at bussen har kollidert med to bilar, og at alle dei fire som er frakta til sjukehus sat i same bilen.
Klokka 11:37 prata NRK med ein av dei første som kom til ulukkesstaden.
– Eg var andre bil som kom til ulukka, seier bilisten som er på veg til Oslo.
– Korleis ser det ut der?
– Det er i alle fall ein bil som er heilt smadra på sjåførsida. No driv brannvesenet og prøver å få ein person ut av bilen, det ser ut som personen må klippast ut.
Like etter klokka 13 var det bilberging på staden for å frakte vekk dei skadde bilane. Busspassasjerane i bussen som kolliderte har blitt frakta vekk i to nye bussar.
FRAKTAR BUSSPASSASJERAR VEKK: Desse bussane blir brukt til å frakte vekk dei som var ombord i bussen som kolliderte.
Foto: Kaia Johnsen Viki / NRK– Eg såg ikkje vegen, heilt forferdeleg!
Bilisten seier at han også trur det er ein annan bil som kan ha vore i kontakt med bussen.
Han skildrar ver- og køyreforholda som heilt forferdelege.
– Eg såg ikkje vegen då eg kom køyrande, det er ikkje sikt her i det heile. Veldig vanskelege forhold.
Han fortel at det er to ambulansar, brannvesenet og politi på staden.
Politiet stadfestar at der veldig glatt på vegen.
– Ulukka har skjedd 150 meter mot Sogndal, på utsida av tunnelen. Vegen er heilt stengd, seier Samsonsen i politiet.
Også Bergstunnelen på riksveg 5 mot Førde er stengd grunna trafikkulukka.
Nettbuss sin buss frå Førde til Sogndal
Administrerande direktør i Nettbuss, Ole Engebret Haugen, seier at det er deira buss som har vore involvert. Det er tale om bussen som gjekk 0930 frå Førde mot Sogndal.
– Eg kan stadfeste at det er ein av våre bussar ja.
