Då 43-åringen først vart kjend med Nikolai Astrup sitt liv og virke, forstod han raskt at dette var ein kunstnar han ville portrettere.
- Les også:
– Astrup var ein veldig, veldig stor kunstnar, og eit interessant menneske. I staden for å reise vekk, så valde han slå seg ned heime på Jølster og sa at her skulle kunsten gjerast, seier Thure Lindhardt.
Viktig bodskap
– I det ligg det ein viktig bodskap; ein treng ikkje alltid reise langt bort, men faktisk arbeide der ein er, legg han til og godt forstår Astrup sitt val.
– Det er heilt utruleg vakkert her, seier han.
Det er akkurat å reise langt bort Lindhardt har gjort for å fylle rolla til den vaksne Nikolai Astrup i Einar Loftesnes og Pål Øie sin dokudrama om kunstnaren, «Flammen over Jølster».
I heimlandet fekk dansken sitt store gjennombrot i 2000, som autistiske Brian i drammen «Her i nerheden». 43-åringen spelte seinare ei mindre rolle i oppfølgaren til «Da Vinci-koden», «Engler og Demoner».
Frå Broen til Astrup
For nordmenn flest er nok Lindhardt mest kjend som politietterforskar Henrik Sabroe i den dansk-svenske kriminalserien Broen.
- Les også:
– Dette er ei ganske anna rolle, og ei anna og viktig tid for Noreg og heile Europa. Dei store kunstnarane, musikarane og forfattarane dukka opp på denne tida, seier Lindhardt.
– Har du lært deg jølsterdialekt, eller snakkar Astrup dansk?
– Det er ikkje mykje dialog i filmen, men eg snakkar litt. Det blir ein variasjon av dansk, norsk og jølsterdialekt.
Storhøi som mentor
Lindhardt i rolla som Astrup er eit aldri så lite kupp for filmskaparane. I alle fall når filmen skal presenterast for utanlandske filmfestivalar.
– Vi ville ha ein god skodespelar, og det hjelper på med ein skodespelar av internasjonal klasse når du skal ha åtgaum i utlandet, forklarer produsent Einar Loftesnes.
I tillegg spelar Dennis Storhøi i rolla som skulemeister og Astrup sin mentor, Anton Fond.
Østfoldingen vann i 2015 Gullruten for beste mannlege skodespelar for rolla som Bjørn Henriksen i «Kampen om tungvatnet».
– Vi har fantastisk flotte skodespelarar framfor kamera, og eit veldig bra crew bak. Ikkje minst har vi mange jølstringar som stiller opp i fantastiske kostyme og viser bygda frå si beste side, seier Loftesnes.
Prisar lokale statistar
– Utan dei hadde ikkje dette blitt noko av, seier Dennis Storhøi om viktigheita av vel 250 statistane i tidsrette antrekk.
Store delar av filmen er spelt inn på Jølster no i sommar. Når innspelinga blir avslutta onsdag, står det att ein sekvens til hausten og ein del filming i utlandet.
Filmen blir å sjå i norske kinosalar neste år, men premieren blir neste vår i Jølster.