Tappa naturreservat for å berge 1,6 millionar smolt

Selskapet godtek ikkje bota på 200.000 kroner og inndraging av 1,8 millionar kroner etter at dei tappa vatnet for fire år sidan.

Barlindbotn Settefisk valde å tappe Jagedalsvatnet for meir vatn enn dei hadde lov til, for å halde i live smolten i det landbaserte settefiskanlegget inst i Eikefjorden.

– Følgjene av å ikkje tappe meir vatn ville vere å destruere store mengder settefisk, seier selskapet sin advokat, Berit Reiss-Andersen.

Naturreservat

Ifølgje førelegget frå Vest politidistrikt vart vatnet frå midten av august til slutten av september tappa ned til 130 cm under lågaste reguleringsgrense.

Selskapet skal ha orientert fylkesmannen i Sogn og Fjordane om den dramatiske situasjonen for 1,6 millionar smolt.

Advokat Reiss-Andersen ynskjer ikkje å kommentere kven selskapet kontakta i forkant, og om det eventuelt vart søkt om dispensasjon, men seier selskapet ikkje såg anna utveg.

– Barlindbotn settefisk meiner dei gjorde rett val å tappa ned Jagedalsvantet utover det som følgjer av vernebestemmelsane, seier advokaten.

– Korleis handterte dei den tørre sommaren i år?

– Selskapet har investert betydeleg i ny teknologi, og klarte seg gjennom denne veldig ekstremt tørre sommaren utan å tappe Jagedalsvatnet utover det som er lov.

Hadde ikkje dispensasjon

Fylkesmannen vil ikkje kommentere saka på noverande tidspunkt. Selskapet har fått bota for brot på naturmangfaldlova og vassressurslova.

Politiadvokat Jørn-Lasse Førde Refsnes seier selskapet hadde grense for kor mykje dei kunne tappe vatnet. Dei hadde moglegheit til å søke dispensasjon.

– Slik dispensasjon hadde dei ikkje, så då var alternativet å stogge drifta på anlegget. Ein er plikta å halde seg til dei bestemmingane som er sett for å verne om eit naturreservat, seier Refsnes.

Tente på lovbrotet

Politiet vil dra inn 1,8 millionar kroner som dei meiner selskapet tente på nedtappinga.

– Hadde dei ikkje drive med produksjonen etter det tidspunktet det er snakk om, så ville dei heller ikkje hatt salsinntekter for smolten dei seinare selde. Dei ville heller ikkje hatt overskot av det salet, seier Førde Refsnes.

Sidan Barlindbotn Settefisk ikkje har godteke bota, hamnar den i retten.

– Saka er forelda

Advokat Reiss-Andersen seier det er fleire spørsmål retten må ta stilling til. Mellom anna vassdragsretten, vernebestemmelsane og tidsbruken til politiet.

– Vi meiner saka i utgangspunktet er strafferettsleg forelda, seier advokaten.

Politiadvokat Refsnes har tatt over som påtaleansvarleg for saka. Han kan difor ikkje svare på kvifor politiet har brukt over tre år på etterforskinga.

– Sakshandsamingstida er formildande omstende ved utmåling av bota. Men førelegget vart skrive tilbake i januar 2018, så verksemda har brukt relativt lang tid på å bestemme seg, svarar Refsnes.