4 av 10 utrykkingsleiarar manglar utdanning

– Alt for dårleg og ein fare for branntryggleiken, seier fungerande avdelingsdirektør Hans Kristian Madsen i Direktoratet for samfunnstryggleik og beredskap (DSB).

Allereie i 2001 kom den såkalla dimensjoneringsforskriften, som stiller krav til kva utdanning brannmannskap i Norge må ha. 16 år seinare er det framleis store manglar.

Mange manglar opplæring

Tal frå DSB frå 2016 viser at heile 37 prosent av utrykkingsleiarar som er deltidstilsette manglar kursing og opplæring.

– I ein aksjon står ein ofte åleine og må ta eit val. Då er det viktig å ha opplæring slik at du gjer dei rette vala, seier utrykkingsleiar, Bjørn Øren.

Han er ein av fleire utrykkingsleiarar, som dei siste dagane har fått naudsynt trening og opplæring i Florø. Der trente dei mellom anna på å redde ut folk frå bygningar, medan dei kjempar mot elden og røyken.

Fungerande avdelingsdirektør i direktoratet, Hans Kristian Madsen seier det er viktig å kunne faget sitt godt. Det er kommunane som har ansvar for at brannvesenet har denne opplæringa og Madsen oppmodar fleire til å komme i gang.

– Ein kjem ofte opp i heiltuventa situasjonar som brann i tunnelar eller bygningar, eller krattbrannar for den saks skuld. Då må du vite kva du skal jobbe med, seier han.

Meir deltaking på lokale kurs

Berre dei siste åra har rundt 60 personar i Sogn og Fjordane fått naudsynt fagleg påfyll. Deltakinga på kursa tok seg kraftig opp då det vart arrangert lokalt. Ifølge Per Otto Selstad i Sogn og Fjordane Brannbefalslag kjem det av at det er for dyrt å reise på Norges Brannskule.

– Her klarer vi å få det til billigare. Etter at vi fekk laga dette opplegget med samlingar på ein eller to dagar har vi fått fortgang i dette, seier Selstad.