Oppdatert 23.01.16: Ulrik Flo reiser likvel ikkje til USA med Brann laurdag morgon. Stryningen er i forhandlingar med ein annan klubb, skriv Bergens Tidende.
Den nyopprykka bergensklubben har med seg både Ulrik Flo (27) og Thomas Drage (23) når dei laurdag reiser til USA og treningsopphald i Bradenton i Florida.
Det gjer også tidlegare landslagsspelar Daniel Braathen, som i fjor spelte for Vålerenga.
– Alle er ledige på marknaden og har takka ja til å trene med Brann under opphaldet i Florida, melder klubben på sine nettsider.
Prøvde lukka
Kontraktlause Flo starta sesongoppkøyringa med Sogndal, etter at han valde å ikkje forlenge kontrakten med Odd Grenland.
Siste tida har han hatt fleire treningar med Brann og har gjort sakene så godt at dei ynskjer å sjå meir av han under treningsopphaldet i USA.
Drage valde på si side å ikkje forlenge med Sogndal etter fjorårssesongen. I mellomtida har han prøvd seg med den engelske Championship-klubben Barnsley utan å få kontrakt der.
Under opphaldet i Florida får trioen også prøve seg i kampsituasjon når Brann møter svenske Jönköping 5. februar.
Drage og Flo er ikkje dei einaste i Brann-troppen med bakgrunn frå Sogndal. Også keeper Piotr Leciejewski og eidaren Azar Karadas har fleire sesongar på Fosshaugane Campus.
P.S. Eidaren Oliver Rotihaug er ikkje med på treningsleiren, melder nettsidene til Brann. Han trenar for tida med Åsane, der han spelte treningskamp torsdag kveld.