Føraren av det utanlandske vogntoget skal sjølv ha komme seg uskadd ut då det byrja å brenne ved Borlaug øvst i Lærdalsdalen.
– Vi fekk melding om brannen klokka 19.03. Den var sløkt klokka 19.54, opplyser operasjonsleiar Olaug Holme ved Sogn og Fjordane politidistrikt.
Brannvesenet makta å avgrense brannen til trekkvogna som står att heilt utbrend i vegbana.
– Vi kjenner ikkje til årsaka til brannen. Den spreidde seg ikkje til lasta, men vogntoget blir ståande litt for å kjølne, før det blir fjerna av bilbergar.
Hovudvegen mellom Bergen og Oslo har vore stengd i om lag ein time som følgje av brannen.
– Det vil om få minutt bli opna for manuell dirigering, opplyser Holme like etter klokka 20.
BRANN: Det brenn kraftig i vogntoget som står på E16.
Foto: Alexander Øren Heen